「第36屆香港金像獎」今晚喺尖沙嘴文化中心舉行，新一屆影帝影后即將誕生，焦點在8項提名嘅《一念無明》、12項提名嘅《七月與安生》及10項提名《寒戰II》爭逐天下。2246：郭富城上台頒發最佳導演。2239：最佳兩岸華語電影由《一路順風》奪得，但冇人上台領獎，頒獎嘉賓許鞍華同趙薇代領。2235：趙薇同許鞍華上台頒發最佳兩岸華語電影。2234：最佳動作設計由《湄公河行動》嘅董瑋奪得，17次入圍，今次係第6次得獎，董瑋未有出席，由電影老闆代領。2227：梁小龍、陳惠敏、盧惠光上台頒發最佳動作設計。三人講述各自入行經過。不過臨睇提名名單時，梁惠敏就講起成龍早前先喺奧斯卡得獎，不過後來有人提佢成龍得到嘅成就獎，梁小龍仲話：「唔好講咁多廢話喇！」2224：最佳編劇由《樹大招風》嘅龍文康、伍奇偉、麥天樞自次奪得，龍文康話﹕「多謝，兩位監製、導演，冇諗過，多謝家人同太太，好多嘢想講，但我想往後繼續寫出嚟，好過嘥大家時間。」伍奇偉﹕「我第一次拍電影，多謝小齊、銀河、媽咪....。」麥天樞﹕「知道父母擔心，怕我活唔到，搵唔到方向，但我應該可以活到，願意用一生去追求嘅事業。」2219：曾志偉、金燕玲上台頒發最佳編劇。2215：陳奐仁、林敏驄、盧凱彤、方皓玟攞起結他，加上白只彈Bass，喺台上演奏，向一眾已故電影人致敬。2203：許冠文頒發專業精神獎，由海報師阮大勇先生奪得，台上話﹕「講嘢對我最困難，朋友知我唔識講，但為呢個獎，我練習咗一段時間。多謝香港金像獎，頒個咁特別嘅獎俾我，體諒我幾十年嘅努力，香港係福地，天時地利人和同環境，造就我嘅工作--海報。多謝許冠傑、許冠文，麥嘉、泰迪羅賓、施南生、曾志偉等，好多好多，仲有宣傳部主任.....，我太緊張嘞，我1975，唔係，係57年嚟香港，今年剛好60年，得到呢個獎係我最大光榮，多謝天上嘅太太，我嘅家庭。」2159：最佳男配角由《一念無明》曾志偉奪得。曾志偉、囝囝曾國祥興奮企起身，余文樂都有企起身。曾志偉面帶笑容，好激動，高舉獎座：「好緊張，好緊張，諗唔到會咁緊張，因為一路都以為攞過啦，有咩咁大不了，睇到對手名單太勁。Paul哥，達哥，智叔好硬㗎！」之後對黑仔講：「我一部撼你26部，下一個就係你喇！」之後對導演黃進講：「睇完套戲係無法抗拒，係城市話題，大家好鍾意呢部戲，冇諗過佢拍得出，寫得出呢個劇本，同埋咁有心。」另外曾志偉多謝對手余文樂話：「冇諗到佢可以演得咁好，喺現場佢完全唔同我傾偈，佢俾時間我揣摩個角色﹐下一個就輪到你喇！」曾志偉喺台上多謝女兒，話自己第一次攞獎都係得到女兒鼓勵。最後佢話如果兩父子一齊攞獎就冇得頂喇！睇你喇！曾寶兒喺台下感動落淚2156：春夏上台頒發最佳男配角。2155：最佳音響效果由《寒戰2》奪得曾景祥、李耀強奪得，但兩位得獎者缺席，由谷德昭代領。2149：最佳視覺效果由《西遊記之孫悟空三打白骨精》奪得，Luke Sungjin Jung、Sang Hun Kim、Chan Soo Kim、Chul Min Kim上台講得獎感言：「我哋會繼續為中國電影發展繼續努力。」2145：谷德昭同林子聰上台頒發最佳視覺效果，谷德昭問：「係呢？點解搵我哋呢？」林子聰就話：「其實就冇理由嘅，係搵我哋再帶出兩位神秘嘉賓。」谷德昭就話呢兩位嘉賓同佢由細玩到大，之後就話：「大家有福喇，今晚頒獎禮嘅高潮。有請周星馳，梁朝偉。」不過兩人只係開玩笑，林子聰就話：「係咪呢？玩大咗喇，收唔到喇！」之後林、谷二人攞出綠面具，配合台上玩CG，扮周星馳同梁朝偉同台，仲話：「最佳視覺效果獎就係咁喇！」2136：最佳女配角由《一念無明》嘅金燕玲奪得，金燕玲已先後獲十次提名，今次第4次奪獎。金燕玲一開口就喊，好感觸話﹕「我真係好開心呀，我冇諗過做配角都攞埋金像同金馬獎，係我夢想，好多謝導演，兩個都得28歲，同我女咁上下年紀，就送咁大份禮物俾我。呢幾日諗咗好多，真心好想擺呢個獎，但又唔敢諗，原來呢個世界上一路有人睇住我，好感謝金像獎評審、睇住我嘅人。電影係好緊要，唔理咩角色，一路好好去做就會有人睇到，呢個係我嘅信念。我仲要多謝我個家人同個女，佢好乖，sorry我唔能可以去英國同你一齊生活，因為你好乖我先可以專心拍電影。多謝向太，Mon...金燕玲唔係邊個，因為佢係佢自己。」2131：余文樂、楊千嬅上台頒發最佳女配角，千嬅同余文樂講：「你殺阿媽喎！」余文樂就話：「不如你唔好淨係講套戲吖，咁樣對其他人唔公平。」之後余文樂喺台上數出，各位同佢「有關係」嘅女演員，佢話喺《荒村公寓》入面張雨綺係佢前女友，JM喺《狂獸》入面係佢紅顏知己。仲叫楊千嬅唔好亂講嘢跣自己。2127：最佳原創電音樂由金培達、波多野裕介憑《七月與安生》奪得，波多野裕介喺台上用廣東話多謝金像獎，再以英文講出感言，佢多謝喺日本嘅屋企人，而且話音樂唔係佢自己一個人嘅事，係團隊合作。之後再佢再次多謝家人、太太、團隊、老師。最後以廣東話講：「我會繼續努力！」2121：最佳原創電影歌曲由《點五步》嘅《沙燕之歌》奪得，Supper Moment上台領獎，佢哋話﹕「第一次係呢個台上表演，第一次攞獎，《點五步》可能距離自己目標以為好遠，但其實可能只有半步，希望大家踏出半步去搵自己想去嘅地方。」2120：關淑怡同陳奐仁上台頒發最佳原創電影歌曲同最佳原創電音樂。2112：關淑怡上台唱出最佳電影歌曲候選作品《美人魚》嘅《無敵》，之後陳奐仁上台唱出《七月與安生》嘅《(It's Not A Crime) It's Just What We Do》，Supper Moment上台唱出《點五步》嘅《沙燕之歌》。關淑怡同陳奐仁再次出場唱出《擺渡人》嘅《讓我留在你身邊》。2101：鄭中基在台上宣佈終身成就獎由芳艷芬女士奪得，成龍上台頒發，佢話芬姐好早瞓，嚟唔到現場，不過芬姐好有心錄咗得獎感言。芳豔芬女兒楊世芳代領獎項，佢代母親多謝各位支持同擁護；亦多謝佢外婆，見媽咪有天份行呢條路。楊世芳又話母親夢想係大家幫手，將粵劇發揚光大更進一步。最後代兄分姊妹以英文講出：「恭喜媽咪，我們以你為榮」2100：最佳服裝造型設計由《西遊記之孫悟空三打白骨精》嘅奚仲文、吳里璐奪得，奚仲文、吳里璐，分別係第7及第5次獲獎，吳里璐喺台上話：「多謝金像獎、評委、北京成個團隊、導演，同奚仲文得獎好開心，喺佢身上學到不止電影方面，仲有其他做人嘅嘢，多謝仲文。」2056： DaDa同邵音音上台頒發最佳服裝造型設計。2055：最佳美術指導由《擺渡人》邱偉明奪得，邱偉明已經係第4次勇奪殊榮，台上話﹕「多謝兩位導演，靚女助手，多謝攝影師，三個職位要做得好好夾得好好，導演、攝影、美術，出嚟畫面好好。我冇諗會攞，因為對手好強勁，多謝大家支持。」2051：林家楝同任賢齊上台頒發最佳美術指導，林家棟話：「最佳美術指導緊係指導美術啦。」任賢齊問budget高低會唔會影響美術指導？林家棟話唔會，因為budget同創意無關嘅。而《一念無明》入面場景唔係最重要，最重要係張床，因為余文樂同金燕玲場床上戲，同時呢場戲令佢地有得提名。最後林家棟講咗句：「香港好多電影budget唔多，在座咁多位老闆添啲」2050：由司儀鄭中基頒發最佳衣着獎，由專業評審任達華同琦琦選出，最後由余文樂同金燕玲奪得。2041：最佳剪接由《樹大招風》梁展綸、David Richardson奪得，梁展綸喺台上講感言﹕「多謝大會，冇諗過攞，但我老婆畀張紙我，等我無甩漏。多謝朱淑儀小姐，係佢叫我接呢部戲，仲有班底俾團火我。仲有編劇大家對作品堅持，最後多謝家人，及屋企人嘅支持，仲有父母天上會支持。」2039：胡子彤得獎後喺後台訪問，問到做咩唔多謝女朋友，佢話：「呢啲私底下會講，佢叫我唔好，因為佢怕醜。」佢又否認情變，至於會點慶祝？佢話：「睇下佢想唔想同我慶祝先啦。」2037：林敏驄同白只繼續頒發最佳剪接，林敏驄喺台上不停搞gag，台下嘅工作人員就狂圈，講講下鄭中基就衝上台拎走林敏聰嘅假鬚。2035：最佳攝影由《擺渡人》嘅鮑德熹、曹郁奪得。2029：林敏驄同白只上台頒發最佳攝影，兩人台上大搞爛gag，林敏聰就同白只講：「其實攝影係幫咗好多，好似舊年咁，拍到你幾靚仔，唔係你點贏我啫！」林敏聰又話問過外籍導演，點樣拍先可以令白只似番個人，之後佢就話高炒低炒，點搞都係攬炒。2027：新晉導演由《一念無明》黃晉奪得，佢喺台上講獎感言：「多謝，好開心好榮幸同咁多位企喺呢個台，亦都證明好似歐文傑咁講，同大家喺呢個浪潮入面。多謝《一念無明》咁多位同團隊，如果冇大家我咩都唔係，好多人話電影有一條命，係每一位同自己生命「咇」出嚟，係有血有肉。」2020：胡子彤憑《點五步》得到最佳新演員獎。而喺大陸嘅直播網，喺胡子彤上台講感受嘅時候，成個轉播暫停。胡子彤喺台上：「多謝香港電影金像獎，我會繼續努力，智叔、整個製作團隊，俾咗好多方法，今我由運動員變做演員，多謝棒球所有教練、隊員、所有兄弟，雖然失去好多同大家相處時間，處理後會再合會大家。最後一定要多謝爸爸媽媽，我愛你！一切嚟得好快，希望繼續用運動員心態行落去，往後有更多機會同大家合作。」2017：洪金寶出場頒發最佳新演員獎。2013：鄭中基唱歌，同舞蹈員一齊演繹唔少香港電影經典場影，包括《天若有情》、《殭屍》、《功夫》、《少林足球》、《阿飛正傳》、《無間道》、《英雄本色》、《甜蜜蜜》。2000：金像獎頒獎禮正式開始，由鄭中基表演魔術揭開序幕，中基話﹕「電影畀我見到我想見到嘅香港，見到我想見到嘅人。」1942：章子怡未嚟之前講明唔接受香港傳媒訪問，但行完紅氈就接受大陸傳媒訪問。佢話睇好《七月與安生》嘅演出，新血好緊要，呢啲潛力無可置疑。有冇帶囡囡嚟？佢表示冇，連汪峰都冇嚟，不過小蘋果就有嚟。1941：童童接受傳媒訪問時，被問到憑《七月與安生》首《(It's Not A Crime) It's Just What We Do》角逐最佳原創電影歌曲獎，佢話冇乜諗，媽咪王菲有叫佢加油。1932：楊千嬅行紅地毯時喺樓梯險仆親，原來佢今日着咗對4吋高踭鞋，仲有千六萬嘅鑽飾，千嬅話﹕「今日我唔係千嬅，係以春嬌身份嚟。一陣會同余文樂一齊頒『最佳女配角』獎，會換多套衫同一套千一萬嘅鑽飾，重心都向前面。」問佢有冇收藏鑽飾？佢笑話﹕「冇乜，我男性荷爾蒙較強，收藏阿仔胎毛、臍帶、頭髮，呢啲比鑽石更重要，將來阿仔婚禮上面，我就會同大家分享番，唔怕俾唔夠料佢，等未來新抱知道我幾錫個仔，要好好對佢。」1921：《7月與安生》團隊影合照，陳可辛叫埋大家企一齊影，周冬雨主動踎係度，陳可辛叫番佢起身，而着褲嘅童童都係主動踎係前面。1912：余香凝早前坐男友車時遇上交通意外，面同鼻骨都有受傷，今日見佢個鼻仲有少少紅，問到康復進度點？佢話﹕「都理想，好番好多，但今日化妝時，好似見到鼻骨凸咗出嚟，但可能係心理上驚啲，o依家坐的士都驚，見人喺唔可以cut線時cut線，或見司機恰眼瞓都驚。」問佢會唔會微調整番好個鼻？佢笑笑口話﹕「朋友都笑我應該襯整親時順便整埋個樣，但我冇。不過現在素顏拍嘢真係未得住，希望快啲好番。」1911：千嬅上嚟樓梯級時，又好似跣一跣，成個人扭一扭、震一震，又係尷尬笑，然後就企上嚟畀傳媒影相。1910：白只完本啱啱影完相，但見到春夏即刻擰轉頭影相，攬一攬，寒喧咗幾句，然後白只就會合番盧凱彤1906：春夏行紅地毯時kick一kick跣一跣隻腳，露出尷尬笑容，好彩有經無險，繼續俾記者影相。1858：衛詩雅現身紅地氈，佢身穿超Deep V晚裝示人，笑容滿面，而且可能去得太盡，側身時不慎露出乳貼。1855：之前不幸遇上車禍傷及面部嘅余香凝，與拍檔廖子妤一白一黑，現身紅氈。期間余香凝十分緊張，不停拍心口定驚。1850：最近吳綺莉被卓林告，吳綺莉更開記者會哭訴成龍未有做爸爸責任養過個女。身為成龍好朋友嘅曾志偉今日行紅地毯時被問有冇向成龍了解？佢一臉惘然，話自己啱啱由歐洲返香港，記者告知後，志偉笑笑口話﹕「家庭事私了。(向太話有人勒索成龍？)嘩，咁嚴重我答唔到。」講完成龍就問關淑怡上月涉刑恐被捕，志偉好感概話﹕「你啲問題尖銳到答唔到，點解我身邊朋友都出事。」當知道關淑怡今晚有份演出，佢話﹕「Very Good，今日可以搵佢。(安慰？)了解啦，今晚活動實撞到，總之《一念無明》嘞。」1844：《樹大招風》團隊現身紅地氈，其中角逐影帝嘅任賢齊拖實老婆Tina現身，林家棟則以一臉鬍鬚look現身。而入圍最佳男配角嘅姜皓文亦帶住老婆金慧英行紅地氈。1830
秦沛、姜麗文、姜文杰一家三口行紅地氈，問秦沛近排係咪好開心？在旁嘅姜文杰話：「好開心！」秦沛話：「頭先，依家，一陣都好開心！」呢兩日係咪特別開心？暗示鄭俊弘近排有好多負面新聞傳出，姜麗文揞住半邊嘴笑，秦沛就話：「呢兩日係攰啲囉，因為喺第二度返嚟，因為時差嘅關係，有時夜晚瞓覺都會笑醒。」問姜麗文，鄭俊弘曾話「無負於你」喎，咁佢點睇？姜麗文以微笑回應，在旁嘅秦沛問在場傳媒：「你哋想唔想我哋開心啲呀？」跟住就還番支咪俾記者。1815：鄭欣宜今日穿上一條超低胸飄逸長裙，佢話係stylist幫佢揀，感覺好青春，問怕唔怕走光？佢話﹕「唔危險，跑步跳舞都得，好穩陣。」佢好開心咁話﹕「今日見到好多明星，好想集郵呀，但又唔敢，最想同林家棟、智叔(廖智智)同達哥(吳孟達)都好正。(點解唔揀小鮮肉？)我鍾意有經驗、有男人味嘅男人。」1810：谷德昭到場就話：「我係好希望周星馳可以踏入音樂界嘅，因為佢有提名作曲同埋填詞吖嘛！所以好希望佢得到呢個突破。」谷德昭同林子聰仲爆星爺今晚會現身，擔任頒獎嘉賓。1808：林敏驄、DaDa陳靜、邵音音一齊到場，林敏驄就貼住DaDa影相，音音姐見到都貼住林敏驄，林敏驄即話：「你做咩啊！」DaDa影相嘅時候唔小心踩到自己裙腳，林敏驄就即刻幫手接，點知就將佢嘅裙越拉越高。DaDa仲疑似飛釘，不過DaDa話唔係真空上陣，有打底，仲話今晚件衫好多布，佢又笑言今日好熱，早知着少布啲。1806：娜姐身穿黑色皮質低胸晚裝，娜姐又講到，今次係「真空上陣」，因為件衫係皮，冇理由反地心吸力，同埋皮嘅衫入面着咩嘢都唔靚，所以黐足膠紙好安全。問到欣宜今日着得好勁喎？娜姐就話今日佢哋着得好襯，係襯番戲中角色。1755：任達華同老婆琦琦擔任今次金像獎嘅「最佳衣着評審」，琦琦話會揀啲最得夠型，夠靚嘅人，達哥就自己話唔會有偏見，唔會只係揀自己朋友，唔會好似奧斯卡咁有偏差。咁如果冇人着得靚過自己，達哥同琦琦會唔會頒俾自己？佢哋就話唔會，一定會揀人哋。琦琦仲話自己開頭都唔知老公着咩衫，達哥又話今晚佢哋會一齊揀最佳人選 ，因為佢哋眼光好相近。1741：鄭中基喺紅地毯接受訪問，佢話：「今晚大家有啲失望，因為自己冇咩嘢講。」原因為係以往司儀講嘢太多，o徙咗啲時間，應該留俾嘉賓同得獎者，因為人哋辛苦咗成年；佢又話自己一開波就唱歌o添！
另一新聞人物關淑怡（Shirley），閉關多日，據知今晚她將現身香港金像獎頒獎典禮，應邀擔任表演嘉賓獻唱，噚晚仲去咗綵排㖭。今晚關淑怡會唱兩首歌，包括《擺渡人》主題曲《讓我留在你身邊》，及《美人魚》嘅《無敵》。今晚有份為金像獎擔任表演嘉賓嘅陳奐仁，佢透過短訊回覆：「Shirley狀態好好，唱得好好，仲傾緊之前搵我寫歌嘅嘢。」問到Shirley心情如何？陳奐仁表示：「Very good wor.」同樣有份演出嘅盧凱彤喺電話說：「佢OK呀，keep到狀態，表現好好。」
|
鍾意就快D Share啦！
|
|
|
