林敏驄（右）同白只做頒獎嘉賓。
搞笑高手林敏驄孖白只頒發第36屆金像獎最佳攝影，兩人不忘搞笑，大講有味笑話。林敏驄一嚟就宣傳自己嘅演唱會：「2017年係好特別一年，6月9日同10日會有一場好精彩演唱會，係紅磡體育館，到時見。」全場一片笑聲，跟住林敏驄先發現身旁白只，佢話：「乜你係度呀？你老竇白蘭度好嗎？」白只都玩埋一份：「佢好好，冇乜嘢！」白只謂：「你細妹『林袋』點？」林敏驄笑答﹕「『林袋』係我細佬喎。」
跟住就話頒發最佳攝影，林敏驄就繼續發揮冇厘頭：「男班長定女班長，我細細個就做班長，唔搵我哋班，唔通塔利班呀。」白只即刻招架唔住：「夠喇！夠喇前輩。」跟住佢又討論點樣可以影得靚啲，林敏驄話：「我都問過鬼佬點樣影靚啲，高炒定低炒，都係攬炒。」林敏驄又「揶揄」白只謂：「好彩舊年拍得你咁靚仔，如果唔係你點係我對手（按﹕去年二人雙雙入圍角逐「最佳男配角」），因為我對手喺呢度！」白只就話夠喇！夠喇！前輩。
搞咗勁耐，終於宣布結果，最佳剪接由鮑德熹及曹郁的《擺渡人》奪得，鮑德熹說：「好享受呢個咁娛樂性頒獎禮，呢部戲拍咗10個月我拍咗6個月，曹郁4個月，王家衛就郁咗我部機4、5次，因為佢係用「光」嘅人，更指向台下成龍謂：「你都冇改我咁多次啦。」
跟住林敏驄同白只繼續頒發最佳剪接，獎項由梁展綸及David Ricardson《樹大招風》奪得。頒奬前林敏驄再次搞gag謂：「林家棟成晚好似含住粒『欖』咁，任賢齊咁輕鬆？因為佢知個奬唔關佢事！」林敏驄說到興起時，黐上的假鬚半飄半甩，司儀索性衝前，當眾幫他將假鬚撕掉，引得全場笑聲雷動。
來源 source: http://hk.on.cc
|
鍾意就快D Share啦！
|
|
|