【東方日報專訊】【李詠林、林蔚恩紐約直擊】謝婷婷與荷里活型男影星「鷹眼」謝洛美維拿（Jeremy Renner）無懼地域阻隔，關係發展一日千里。雖然兩人坦言正在了解中，但早前婷婷自爆已見了男方家長，感情更進一步！專心工作的她明言可以唔生BB，不介意另一伴已有小朋友，擺明講畀已有女兒的謝洛美聽！
紐約學藝換來淚水
謝婷婷早前應品牌Michael Kors邀請到紐約出席時裝周，並在當地接受本報專訪。除了出席活動外，婷婷再次到訪紐約的另一目的是去進修戲劇，不過同樣的地方，原來三年前曾令她留下不少眼淚，婷婷透露在舞台上課有不少規矩：「喺台上唔可以去廁所、唔可以掂人，Warm up時人哋做乜你都要跟住做，人哋瀨地下都要跟住做，投入跟佢嘅情緒。（捱鬧？）老師上堂用理由去解釋畀我聽，畀機會我去搵答案。」她坦言因給予自己太大壓力，最後要打電話給媽媽狄波拉大喊：「我唔開心都唔會打畀父母，但我記得嗰晚凌晨3點半打畀阿媽，喊到收唔到聲，自己畀自己壓力！嗰時好忟，老師問我想點，但我知就唔使上堂喇！因為嗰日佢要我演嬲，但我係唔會嬲，我同佢講演唔到嬲，但最後慢慢佢真係令到我好嬲，想我了解自己多啲。」婷婷指上完課程後演技有所提升，有時間會繼續進修。
拒與霆鋒合作拍戲
婷婷出自演藝之家，一家人舉手投足都備受注目，曾有不少電影及真人騷欲邀其父親謝賢與哥哥謝霆鋒一同合作，但她覺得會有角色混淆：「由細到依家都係大家睇住我哋大，喺戲入面叫阿哥飾演唔係我阿哥，而係另一個角色，好難接受！」她直言現時一家人的感覺比以前更親密，最大關係是因為霆鋒：「佢唔同Stage，依家煮嘢畀人食，有唔同交流，之前佢唔係咁多機會。我一直都係父母想食飯，就一定會放低手上嘢去陪家人。（哥哥好照顧你？）佢係好哥哥，但其實係我乜都Take Care佢。」
幾時結婚？心裏有數
近期最令人關心婷婷的相信是與謝洛美的感情，她直言會先專心工作，愛情只排第二：「大個女想Focus工作，唔會為愛情而改變生活，工作好好，覺得有好成績要Keep住。我做咁耐都冇試過唔鍾意工作，只會更愛工作。」婷婷直言身邊有不少人痛錫自己，謝洛美亦是其中之一，兩人正處於了解階段。習慣獨立的婷婷鍾情成熟男，看來謝洛美是不錯的選擇：「我自己個人都係成熟！諗番以前都係我Take Care人哋，但人愈大就知自己鍾意乜、唔鍾意乜。睇戲睇得多要拍拖結婚生仔，但我唔覺得係適合每一個人，唔係話老咗要小朋友去Take Care自己，而當係一個原因，當然做女仔要有一個Timeline。」她還明言不介意對方已有小朋友：「如果我工作帶去到一個地步，係我生唔到BB，我係OK！但要對方都OK！就算我依家認識對方已經有BB，我覺得完全冇問題，細個會覺得唔得，但依家覺得對方已經有BB，Great！」暗示不介意謝洛美有女兒！其實婷婷早前與謝洛美過情人節，又見過對方家長，期待她能開花結果，有好消息公布！
後記：真．膽大
婷婷在外國長大，衣着打扮都有自己一套方式，性格率真。拍攝當日正值負零下幾度，但婷婷只穿一件白色恤衫及長裙在室外拍攝，為求有更靚的照片更大膽到走出馬路取景，讓攝影師捕捉率直自然的一面。
文：名人組
服裝：Michael Kors
|
鍾意就快D Share啦！
|
|
|