洪永城（Tony）與蔡思貝（Sisley），同是新一代無綫力捧的藝人，兩人的喜好、性格、處事方式都大大不同，正好一個凹一個凸，他倆從拍劇合作的同事漸漸成為好朋友，Sisley更自爆在連串負面新聞爆出時，幸得Tony包容，給予她發洩的機會！
T：洪永城 S：蔡思貝
好蝦vs強悍
Tony是個大男孩，外形讓人覺得他是一位對任何事都冇所謂、易話為的人，不論對女友還是朋友，都依對方的意願去做，相反，Sisley卻讓人覺得她是強悍、要求別人順從自己的人，事實與想像，是否如此？
S：細個有諗過如果我係男仔，做我女朋友一定會好幸福，因為我鍾意照顧人，外人覺得我強悍，其實我唔係㗎，強悍係外表啫！
T：我睇落去好似好好蝦咁，畀人感覺中性啲，可能係與生俱來畀人覺得我「腍善」啲啦，但我就覺得自己唔應該太易話為，要有自己性格，唔係為咗迎合大家屋㗎嘛。
生於無綫 vs 長於有線
Sisley是港姐出身，Tony則從有線過檔到無綫，二人在工作的際遇上有何不同？有沒有羨慕對方的際遇？
S：我由選港姐之後一直好順境，選完兩個月就有劇拍，好感恩啦，雖然呢三年有挫折，但得到嘅嘢真係好多！
T：其實呢樣嘢我哋冇得比較，男同女際遇本身都唔同，不過我自從加入TVB後，所行嘅路都係我想行嘅，可以有拍劇機會、有得做主持！
零負評vs負皮女王
他倆效力無綫以來，Tony形象討好，加上公開與唐詩詠的戀情，幾乎零負面新聞，Sisley反而負面新聞不斷，被評做戲差、爆出假學歷、否認與舞蹈老師麥秋成的戀情等……，爆出假學歷新聞時，二人正合拍《味想天開》，Sisley直言當時情緒好差，會無故發脾氣，受氣者正正是對手戲最多的Tony！
S：每個人際遇都唔同，依家我面對負面新聞都冇所謂啦，真係刀槍不入，我都好感恩有呢啲事發生，將來遇到幾多風風雨雨都唔怕，好多嘢整定嘅，被打擊都係人生好重要嘅課程！
T：我好彩啲，加入TVB前都有七年主持經驗，見識多啲，你唔同呀，一出嚟就係大世界，面對嘅圈子、所受壓力好唔同，我經驗多啲，你會吃力啲，呢啲事唔係個個都應付到，你仲後生，有時間嘅！
T：嗰時你有幾單添啦，日日打開報紙，心諗：「嘩，又係你呀！」嗰時你情緒有起伏，但好厲害，做戲嗰陣又唔影響喎，不過做完就發癲
S：點解可以同你做到朋友呢？我諗就係因為同你拍《味想天開》嗰時，假學歷單嘢搞到我好煩，好多嘢有口難言，心情好受影響，成日喊，但拍劇唔可以表露出嚟，同你對手戲最多，咪用你嚟發洩囉！
T：係㗎，好無理㗎，例如會話『做咩唔幫我拎嘢』、『做咩唔畀錢呀』咁。
S：真係為嗌交而嗌囉，不過我知你明白，又冇擺喺心，你知道我唔發洩出嚟會好辛苦！
T：其實係知你辛苦，咪就吓你囉，等你再去改變
少緋聞 vs 多緋聞
Tony的緋聞女友，來來去去都是黃翠如與詩詠，如今翠如名花有主，Tony每次見記者都被追問與詩詠的戀情，相反Sisley的緋聞男友就多籮籮，有羅仲謙、鄭俊弘、溫家偉、周志文、沈震軒等等，難道公開戀情才是杜絕緋聞的最佳方法？
S：我只可以講我人緣好囉！其實做對手戲都係男仔，我拍《純熟意外》嗰時同賴慰玲、孫慧雪變成好朋友，阿雪結婚我仲做姊妹添，又唔見有人講！
T：公開戀情可以擋緋聞？或者係啦，係好事嚟㗎，不過次次都係畀人問戀情，冇咩人問我工作，係有少少美中不足！
S：好多人為咗避緋聞要避呢個避嗰個，係好壓抑，其實咁樣好辛苦，我覺得有開心嘅心情，先可以做嘢做得開心，依家我反而唔會避
開籠雀遇上鵪鶉
Tony人前人後十足開籠雀，面對記者都不時開玩笑，但Sisley面對記者卻很慎言，她直言初出道時「講得太多」，衍生出不少負面新聞，Tony似乎不太明白，尤其二人面對有關戀情的新聞時，更是一個天、一個地！Sisley說：「我唔似Tony呀，佢同詩詠係另一位置，我冇成就，想人見到我努力做嘢。」Tony就說：「我唔係太介意嘅，開心事係應該分享吓！」
|
鍾意就快D Share啦！
|
|
|