藝人鄧麗欣（Stephy）率領排球隊Loey參加「第37屆全港公開排球錦標賽2017」的女子乙組賽事，穿上5號深藍色球衣嘅Stephy比賽前專心熱身同隊友猜波，但未知道係咪因爲上一次連輸兩局，而神情都有啲緊張呢？
一開波，Loey先攞兩分，但之後就畀對手連追幾分反超前，Stephy期間都有起手殺波，力水明顯比以前大咗，不過隊員之間嘅默契就好似麻麻地，表現亦有啲唔穩定搞到頻頻失誤，第一局輸13比25！去到第二局，Loey就打得放咗，雖然畀對方拋離5分，但因為對方失誤，比數一度拉近至16比16，去到尾段雙方爭持得相當激烈，更反超前22比20，不過就不斷被求證吹double，見到Stephy都愈打愈忟，最後賽果Loey22比25落敗，連輸兩局。
賽後接受訪問時，Stephy表示第一局大家都仲未熱身，雖然第二局打得好啲，都未能發揮訓練時嘅水準：「唔知呀，最近我哋球隊個精神好似好浮動咁樣，所以比賽就係咁，其實嚟到現場冇乜足夠熱身，對方都係，所以開局係打經驗同信心，但係依樣嘢我哋好弱。成日第一局大比數落後，後面會追得好辛苦。」問到是否換了一批新球員？Stephy透露因有球員退出及有傷患，所以都換了好幾位球員，更直言球隊及球員好難keep，因為大都只係業餘，而其中兩位年輕球員都係只得十幾歲，所以經驗都爭少少。
提到有冇信心可以贏到接下來嘅比賽，佢話依家輸咗兩場仲係0分，所以升上甲組都有啲難度，笑言：「唔好跌番落去！（係咪默契都爭啲？）因為都夾咗唔夠一年，心態好緊要，其實我哋每個個體都有技術，但排球就係咁，冇得做英雄。」講到剛才比賽殺波大力咗，Stephy笑言因為自己年紀最大，所以都會私底下加強訓練，同時都因為之前拍戲練咗空手道，所以大力咗。不過Stephy都好擔心，因為五月就要離開香港拍戲，但會盡量有時間就出席訓練，希望唔好拖累隊友。
|
鍾意就快D Share啦！
|
|
|