豪語錄
也無風雨 也無情 彭秀慧
如果年齡是女人的秘密，彭秀慧倒是坦蕩蕩。舞台劇《 29＋ 1》○五年首演，轉眼十二年。彭小姐也順理成章，進化成 29＋ 1＋ 12，「我從來都唔驚三十歲，三十唔係我嘅大限，但的而且確有人覺得係。」
所以此劇歷久不衰，單在香港已八度公演，累計觀眾超過四萬人次。如今拍成電影，勢必夭中更多中女的死穴。未知會否有慶功宴，彭秀慧已吞下乾燒伊麵打底：「人人都覺得套戲對我好重要。係好重要，我本着所有希望去做好佢。但佢係咪我嘅全部？唔係。」「我一早就預咗呢套戲係可以失敗嘅。當然，我唔想佢失敗，但冇嘢係必贏。由 day 1開始搞 production，我已經同自己講，你終有一日會損手爛腳。當嗰日嚟到，就唔會咁難過。」
走過烽火大地才不敢樂觀？彭秀慧的藝途也算穩步上揚，但秀慧的人會自學期望管理，「人大咗，先明白經歷係好嘢。好嘅意思，唔一定係好開心，而係你會從中學習，捱過一關，再繼續行。我做咗呢個古仔十幾年，最大嘅得着都係咁。也無風雨也無晴，呢個係一個境界。」
娜姐
在劇場看過《 29＋ 1》的都知，兩個多小時又喊又笑的獨腳戲，非尋常中女所能應付。但彭秀慧自信滿滿，「呢刻都仲得嘅。」比起劇場，片場歲月更不饒人。通頂一晚，如老三秋。與她筆下擁着披肩和暖水壺的中女形象，格格不入。但在拍攝期間，彭秀慧直踩二十小時後仍然金睛火眼，令接載她的司機嘖嘖稱奇，「導演通常一上車就瞓，點解你咁精神？」「啱啱拍完，好難會好眼瞓㗎喎。」「咁你都幾捱得。」
無睡意，可能只是 hyper過後未回過神來。無法再扮演三十歲，卻是事實。《 29＋ 1》電影版，彭秀慧繼續自編自導。她在舞台上分飾的兩角，由周秀娜和鄭欣宜擔綱。男人視周秀娜為幻想對象。女人呢？幻想自己變身成周秀娜的，肯定佔少數，「好笑㗎，有人同我講，周秀娜喺屋企，點都著件性感少少嘅睡衣啦？」結果埋沒了娜姐的波濤洶湧，「我希望觀眾睇到佢另一種美。呢個古仔冇可能係男導演拍㗎，嘿嘿。」「我都唔知係咪太自大，或者自視過高。我想人哋係因為呢個古仔入場，而唔係其他。」
早幾年，人人把「增值」掛在嘴邊，𡃁模也要進修演技。彭秀慧因此收了若干徒弟，周秀娜是其中之一。後來𡃁模大都淪為失蹤人口，惟周秀娜成了女主角，「我同佢一路係學生、老師的關係。我見到嘅，只係一個人，而唔係一個性感 icon。」「好多人都唔信，其實周秀娜好內斂、好怕醜。可能佢影相時會好自信，但演戲時，佢都有冇自信嘅時候。我就好似媽媽咁，俾信心佢。」
欣宜
娜姐、欣宜分別飾演林若君、黃天樂。前者是急驚風、事業型；後者任由青春在黑膠唱片的旋轉中流逝，而不覺心痛，「好多人細個時都係黃天樂。比好多同齡女性，我嘅林若君係遲啲出現。」「我廿幾歲時係一嚿飯，浪費咗好多時間、模糊地過。到好大個先懂得感受自己嘅存在。」
彭秀慧來自單親家庭，是獨生女，這點與欣宜接近。媽媽外出工作，她習慣獨處。家中冷清，好處是家庭擔子也輕。廿一、二歲便開始獨居，也不用交租，香閨漸漸成了友儕們的私竇，「打風落雨，放工放假一定嚟我屋企。」在演藝學院畢業後，加入中英劇團，大部分時間做主角，「淨係知自己鍾意演戲。但點解要演戲？用我嘅技能，喺呢個世界可做啲乜？以前唔會諗。淨係知道返工有糧出、放假去邊度玩。」「咁係咪唔得呢？好多人都過緊呢種生活。但突然有一下同自己接通：或者有啲嘢你好想做呢？」
她廿八歲辭職，後來獲香港戲劇協會的獎學金到巴黎進修，三十歲開始寫劇本。世上從此有了《 29＋ 1》、《伊莎貝拉》（彭浩翔執導）以及一系列的獨腳戲，「唔使死嘅，不如試吓啦。所有嘢都係由『不如試吓』開始。」
單身
現實中的周秀娜，上有高堂下有弟妹。地產版經常影到她出入樓盤現場，只謂事業線中有黃金屋，卻沒想到她家中人口眾多。彭秀慧無甚經濟壓力，自然有遲熟的本錢，「我到三十歲之後，好想做好自己嘅工作，林若君的感覺才愈來愈強。」
不幸的是，林若君經過一百分鐘的忐忑後，還是與十多年的男友分手收場。彭秀慧算是淑女自道？雖然這結局在十二年前已敲定，「唔完全係我嘅自傳。到而家，我都冇試過十幾年雞肋式的關係。但一定係有經歷，先有咁到肉的創作啦。」幾耐冇拍拖？「呀……太過分啦呢個問題。」「我唔心急，但好奇。每次冇拖拍時，我都諗下一個我會鍾意咩人？或者咩人會鍾意我呢？你永遠都無法知道。我唔渴望，但唔代表我拒絕。」
戲中的女強人還有個「終極版」，叫金燕玲。單看選角，便知又是那種修煉成精，卻愛情無望的女子。這是彭秀慧四十初度補記的一筆，「寫呢個角色時，我明白我嘅人生重點擺喺邊。我甚至唔覺得呢啲係犧牲。重點係舒服、做你想做嘅嘢。」「所謂傳統家庭、一家四口，可能唔係唯一嘅答案。但我係咪抗拒？唔係。只不過唔同時候有唔同選擇。」
幸福
訪問在某樓盤的示範單位進行，新樓裝修自是美輪美奐。彭秀慧住慣鄉郊村屋，處身三數百呎的市區樓，感到局促，「我真係好幸福！屋企望出去，係海同埋山，完全無敵。」「有時去到朋友屋企，就算係非常高尚嘅住宅，我都感恩，因為我真係好鍾意自己屋企……」
有點誇張。情況就似闊太談起自己的老公仔女人生，是如何完美。可以炫耀的，才是真正屬於自己的資產。彭秀慧擁有的當然不止靚景香閨。談起《 29+1》，她一樣雙眼發光，「昨晚優先場，有個七十一歲的婆婆，自己嚟戲院睇咗三次，覺得好 touching、講中佢嘅故事。」「好震撼，原來係咪七十年代出世、係咪聽張國榮，都唔緊要。真正 universal的，唔係嗰個年代嘅回憶，而係嗰種情感……」無論票房如何、感情有沒有着落，彭秀慧已經是人生勝利組了。
撰文：蔡慧敏
攝影：黃志明
攝錄：葉志明
形象：黃碧珊
服裝： Alice+ Olivia
髮型： Jo Lam@ Queen's Private i Salon
化妝： Angel Mok
場地： Wheelock Club& Facesss
|
鍾意就快D Share啦！
|
|
|
