掃呢頁CODE去手機

2017年5月11日 星期四

直擊富豪飯局 [壹週刊 - 1418 - 財經] __,富豪飯局,M1,

Fancl老細陳志明爆響口話,搵到個廚先敢去開餐廳。中環人語直擊富豪飯局好多人對富豪飯局都充滿幻想,小宗帶大家見識吓一餐包房富豪飯局是如何的。坐得埋食 ...


Fancl老細陳志明爆響口話,搵到個廚先敢去開餐廳。

中環人語

直擊富豪飯局

好多人對富豪飯局都充滿幻想,小宗帶大家見識吓一餐包房富豪飯局是如何的。坐得埋食飯嘅,大家梗係咁高咁大,席上有全港最大招牌嘅連鎖食肆大少爺,又有剛拉完頭馬嘅潮州大馬主,仲有新界大地主,以及上市公司主席伉儷;呢餐飯嘅「飛士」在於餐廳É PURE老細兼 Fancl老闆陳志明( Christopher)都有出席,由工程師到做紡織廠再代理 Fancl,今次涉獵埋 Fine Dining。同樣是「家己冷」的志明唔只識食,仲識煮番幾味,餐廳內仲有個「私家 wine list」。

富豪食西餐,梗係要「間」過吓支紅酒,人未到齊,主人家已擺陣,五大酒莊一字排開嘅靚酒,一睇就知典型有米富豪, Cristal 2007, La Mission Haut Brion 1997, Margaux 1997, Mouton Rothschild 1957,死未?再加埋一支賓客自備 Lafite-Rothschild 1961,五十幾年珍藏,真係冇番咁上下功夫都搞唔掂支酒,原來É PURE在四季酒店 Caprice挖咗個侍酒師,即席開瓶無失拖。

飯局中段有位唔係好怕醜嘅富豪為在座闊太「謀福祉」,謂:「吖,老細,有冇 Fancl化妝品 sample送俾在座女士呀?」 Fancl老細志明又點會唔明女人心,即場讓闊太任揀 Dalloyau朱古力及 Marcaron,食肆大招牌少爺仲慌死大家唔識此法國皇室名牌,把 Dalloyau即譯為「大籮柚」,讓闊太們對此品牌刻骨銘心,呢餐飯幾多錢,酒逢知己又點計呢?不過未能攀上富豪飯局之列,É PURE有間 Cafe,午市兩嚿水諗得過,去感受吓間餐廳裝修都抵番,話晒間設計公司 Yaba Pushelberg嘅代表作有多倫多及東京四季酒店及香港 LV。

紅酒陣一字排開,左起: Haut Brion 1997, Margaux 1997, Haut Brion 1997, La Mission Haut Brion 1997, Mouton Rothschild 1957, Lafite Rothschild 1961, Cristal 2007。

這餐富豪飯局由酒、菜、甜品以至紀念品都充滿法國味,闊太收到「大籮柚」 Dalloyau朱古力及 Macaron,價值七至八百元。

頭盤配有白魚子醬( White Caviar),即是法式蝸牛蛋,非常矜貴。

解放軍向海豪宅

喺香港,唔使買「富豪海灣」都可以有富豪級嘅 feel,就係做解放軍啦,沿赤柱黃麻角道入,經過富豪海灣,是赤柱軍營禁區之地,行人止步,外間無從得知此一百二十二公頃軍事用地到底係乜,不過坐住艘艇從另一角度就窺探到十幾座軍人官邸,一梯兩伙風涼水冷,幾咁有氣勢,呢啲咁有品味嘅官邸都係英國佬留落嚟,喺今時今日鬧地荒嘅香港,真係寧願當兵做解放軍。

中環寸嘴:今時今日,綠帽唔怕戴……

工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

老牌股神畢菲特( Warren Buffett)賣走 IBM,承認冇投資 Google係錯嘅,資深投資者都要掟「過氣名牌」,男人有句說話:「綠帽唔怕戴,最緊要除得快。」好似澳門前特首話齋,邊個男人冇做過一件半件對唔住老婆嘅事吖?有時投資做錯咗決定,就要補飛,如果唔係,香港點做金融中心。

政府揼五十四億去迪士尼擴建,即係賭迪士尼係名牌,以為一個迪士尼就救到香港旅遊業,慳工夫冇話引入其他有潛質嘅競爭對手,小心一陣又只係整幾隻咖啡杯俾你,轉吓轉吓咪死得?以往啲人賭馬買 1 win 3 place,以為獨贏唔得都搏佢贏位置,現代賭法就要買多幾隻馬「互串」,如果唔係就「褲穿窿」。

嗱,除帽要除得快就不適用於澳門新賭王呂志和,佢形象鮮明,出入所有高級私人會所有特免權,有醫生證明健康理由,唔使除佢頂喼帽,認真有青春,有活力,此乃有見於佢成立之呂志和獎,得獎者包括前美國國務卿賴斯,呂志和有如中美鎖匙人物,有已故船王董浩雲創立海上學府之影子。

林智遠  Nelson Lam

股神都要掟過氣名牌 IBM。

全世界最「細」的迪士尼,仲係轉緊咖啡杯。

誠哥孫仔讀全港最貴學校

座落於貝沙灣的弦立書院( ISF)出名「貴」,想直入俾$650萬買債券,就好容易有入學權,是國內不少官二代的「飛佛」學校,甘比女兒及吳君如個女都喺呢間學校就讀。呢個禮拜,弦立班家長特別興奮,就係多咗個新同學仔——長治,即是李嘉誠個孫,同學仔急不及待去迎新,聽講就讀 K3 Foundation,上月剛八歲生日的長治較同班同學仔年齡大, ISF着重中文,中文分咗十個級別,即使同班同學各自有不同級數,長住加國的長治可能要學爺爺話齋要「多努力」追番中文程度。

上月梁洛施被本刊拍到帶同三子返港,長子李長治(右二)剛於本週在弘立書院上學。

弘立書院位於貝沙灣,以買債券計,是全港最貴學校,去年債券價格為六百五十萬。

甘比女兒也入讀弘立書院。


鍾意就快D Share啦!