探熱針
重返大台唔衰得 宣萱狂操熱褲晒玉腿
離開大台五年，宣萱揀中《不懂撒嬌的女人》作為回歸頭炮，為了要令人有眼前一亮感覺，宣萱在開拍前刻意搵教練進行地獄式狂操，結果俾她成功塑造潑辣女強人「 Mall姐」一角，劇集出街短短一星期，全套戲日鬧夜鬧，鬧到係人都知宣萱就是 Mall姐。
46歲的宣萱 keep住做運動，上週五（ 5日）下午 3時，她一身運動 look露出一雙白滑玉腿，在人頭湧湧的中環街頭，分外搶眼，正忙於篤電話的宣萱， 9秒 9發現有記者，即時 Mall姐上身，笑笑口對記者說：「我當見唔到你！」 Mall姐的氣場頓時表露無遺！
搵教練特訓
深明唔 keep好易老的宣萱，離開大台後因為減少了幕前演出，有一段時間宣萱身形同狀態都有明顯走下坡現象，直至去年她決定回巢拍《不》，向來唔衰得的宣萱，積極 keep fit，又聘請教練鞭策自己定時定候做運動，果然宣萱極速回復狀態，今次在劇中就算面對 4K拍攝都依然省鏡，狀態比五年前離開大台前更 fit更 young。
就連不少網友都激讚 Mall姐凍齡 keep得好，無頸紋，宣萱指除了勤力做運動、 facial外，也託 4K的鴻福，她表示：「 4K有呢個好處，佢後期可以做好多嘢，係咁捽（頸紋）囉！」相當坦白。
上週五（五日）下午三時，著住風褸熱褲，左一袋右一袋的現身皇后大道中，一雙白滑的玉腿，結實有線條，明顯是努力操番嚟的成績，宣萱邊行邊傳語音短訊，但警覺性未有半點減低，記者只是在她身旁走過，宣萱已經察覺有人拍照，並瞄到鏡頭所在，揮揮手對鏡頭打招呼，然後突然 Mall姐上身，對記者說：「我當見你唔到！」便電兔般過馬路，往中建大廈的 shopping mall進發，宣萱於商場內遊走兩間時裝店，店員一早預備定一袋二袋給她拿走，估計是作為《不》劇宣傳之用。
收視有交代
宣萱對上一套無綫劇，已是一二年的《飛虎》，之後主力搵人仔、拍港台劇，這次回歸宣萱坦言是她和公司多份合約中，最快拍板落實的一份。
「之前當然睇過大綱（劇本），了解過班底，但係（決定）只係五分鐘，用電話，呢啲係杜生（杜之克——無綫副總經理）嘅誠意。」宣萱說。
為宣萱度身訂造的《不》劇，標榜 4K全實景拍攝，出街短短一個星期，最高的平均收視有二十六點，即使是慣性收視慘淡的星期六、日，平均都有二十和二十二點，成績相當不俗，不過宣萱唔心急再為大台拍劇，她說：「一切都要先睇劇本再決定。」
撰文：娛樂組
攝影、攝錄：蕭敬漁
|
鍾意就快D Share啦！
|
|
|
