76歲嘅陳自強係70年代嘅著名經理人，當年佢旗下嘅藝人粒粒巨星，好似成龍、鍾楚紅、張曼玉同張學友都係佢啲仔女，但係08年成龍突然同陳自強終止咗合作關係，「兄弟情」正式決裂，成龍大小事務改由其妻林鳳嬌接掌，但佢哋「分手」嘅箇中原因，一直成疑。直至陳自強同成龍「分手」6年後，即2014年，陳自強接受商台訪問時，就指成龍「走火入魔」，令佢無奈引退。陳自強喺節目中憶述，當年他是透過秦祥林認識成龍，陳自強謂與成龍從來冇簽過一紙合約，關係如兄弟：「我哋有粥食粥，有飯食飯。佢叫我brother，佢話自己唔識字，叫我幫手睇文件同劇本，幫佢分析。當年佢話『我唔會唔養你，我唔會唔理你』。」節目中，陳自強更爆成龍大鑊：「慢慢佢(成龍)紅到有啲走火入魔，已經唔再需要我幫，我又冇乜嘢可以幫到佢，同枱有好多大官，一係大有錢人同yes man，我嘅嘢唔再入耳，好多人想入我個位，有我喺度真係好煩。我知道好多人想take over個位，咁不如自己瀟灑咁離開，好過俾人話『終於被逼出嚟』。」同成龍合作三十幾年，陳自強坦言好唔捨得，亦感觸萬千：「真係好可惜，過去37、38年，佢由一句英文唔識，由我拖住佢、監佢上飛機，唔止係佢屋企嘢，仲係全個家庭。由祖名出世，到喺美國搵屋畀嬌姐（林鳳嬌）佢哋住。」訪問中，陳自強亦提到，99年吳綺莉懷龍種事件，成龍曾失言道出：「我犯了天下男人都會犯嘅錯」陳自強就否認當年佢有聯絡過吳綺莉講數：「當時好多軍師，最初用意係想講聖經中有女子被人用石頭掟死嘅故仔，想話好多男人會犯錯，點知佢講咗『天下男人都會犯的錯』，我哋都愕然。」雖然二人兄弟情不再，但後來成龍六十大壽時，陳自強都有出席，他稱：「大家冇尷尬，唔係殺父仇人。」前年元彪嫁女時，成龍同陳自強都係坐上客，而成龍都有主動上前搭陳自強嘅膊頭。
| 陳自強曾做成龍嘅經理人三十年。(資料圖片) | | |
| | | |
| |
|
鍾意就快D Share啦！
|
|
|
