EYT擅演祥嫂 情緒病折磨離無綫
馬小靈痛憶 子女掃走抑鬱病
【母親節系列之走出困局】馬小靈01年在《歡樂今宵》（EYT）憑扮演祥嫂洪金梅為人認識，但之後星途未有突破，數年前已轉行。原來她兩度患抑鬱症，千禧年因矯齒失敗而鑽牛角尖，自覺毁星途，一年多前又因工作壓力令抑鬱症翻發，暴瘦至80多磅，更日日想各種自殺方法，慶幸其一對子女的一句說話令她驚醒，帶她走出低谷。
馬小靈曾兩度患抑鬱症，病情嚴重時更日日想輕生，最後因一對子女拯救她戰勝抑鬱病。攝影：沈健程
現年42歲的馬小靈曾參與無綫綜藝節目《歡樂今宵》，扮演祥嫂洪金梅等發揮搞笑本色，令人留下印象，她於10年約滿轉行，現時身兼地產、保健食品傳銷及體檢中心職員三職，與攝影師老公育有一對子女。日前，馬小靈帶同仔女接受本報的母親節主題專訪，又溫馨整cupcake，幸福媽媽有仔女萬事足，原來近十多年來，她兩度患上抑鬱症，要長期復用抗抑鬱藥，令人生陷於苦戰。
馬小靈為仔女未雨綢繆，現時打三份工的她不怕辛苦。
當年馬小靈在《歡樂今宵》扮祥嫂洪金梅而為人認識。資料圖片
矯齒失敗
去年馬小靈抑鬱症復發，她首次發病早於一對子女出世前。當年她在娛樂圈發展，在商台做過DJ，之後加入無綫節目《歡樂今宵》，亦被監製李添勝睇中，參與戲劇組拍劇，算有不少發展機會，但千禧年她為了上鏡更好看，接受齙牙矯形而出事：「有間矯形診所話肯贊助我，畀6千蚊就可以扭番正隻牙，最後唔掂，搞到日日似有人鑽你個頭，痛到崩潰，覺得自己嘅愚昧搞成，加上覺得做藝人呢行，唔會有人等你，黃金20幾歲就白白冇咗，搞到鑽咗牛角尖出唔番嚟！」
馬小靈於06年結婚，做高齡產婦生了一對可愛子女，為保障將來生活更身兼三份工，依然咬着牙根面對，估不到去年4月，她兼識做保險公司接待員而令情緒病翻發：「返朝9晚6一腳踢，一種無形壓力令你崩潰，親子活動甩晒，份工又做唔好，做個稱識媽媽做唔到，覺得自己好冇用。同老公講，佢話個個返工都係咁，好似俾人插咗一刀，呢個負面諗法一擴散，就不可收拾。」當時她要長期食藥，生活猶如行屍走肉，黑眼圈、黃夾瘦，體重跌至80多磅，辭工匿在家不敢見人，更想盡各種自殺方法，最終父母由澳洲回來探她，家人帶她見精神科、社工及入急症室。
入行後的馬小靈因矯齒手術失敗，自覺被愚昧毀星途。資料圖片
母親節將至，馬小靈獲子女親手做高踭鞋cupcake做禮物。
打三份工
在人生最低潮時，救她走出情緒病低谷的是一對子女，做她的守護小天使：「我最絕望時，連家姐都覺得媽咪好似變咗另一個人，但你只能發呆睇住佢哋，有次家姐同細佬走埋我身邊話『媽咪，我好鍾意你呀，錫錫！』又不停錫我，當時你會覺得好難受，因為唔識開心。不過之後就『叮』咗一聲，個腦好似清醒咗咁。」
今年年初，馬小靈不用再服食抗抑鬱藥，身體漸回正軌，積極為子女將來未雨綢繆：「小朋友對自己嚟講係一種動力，喺能力範圍內要搵多啲錢，地產經紀對我嚟講算最快搵到錢嘅行業，就算日曬雨淋企到腳痛都值得！」雖工作忙，但她亦有心願，希望將來可以推出關於情緒病及如何自救與育兒心得的書籍。
採訪：王梓嫚
|
鍾意就快D Share啦！
|
|
|
