大台等人用，造就唔少原屬三、四線嘅藝人有發圍機會，出身藝員訓練班嘅張振朗(Owen)，屬其中一個幸運兒。外型、五官有點點似黃宗澤嘅張振朗，有幸俾大台力谷上位，感情事當然要冷處理，所以即使佢三番四次俾人影到同34D巨胸小花陳芷尤(Apple)斷正拍拖，但依舊否認戀情，一於將戀事密冚。不過日前(22日)有《蘋果》讀者梁小姐透過《爆相爆片》，見到張振朗同女友陳芷尤，秘密去咗荷蘭阿姆斯特丹市旅行。據梁小姐表示，當日見到張振朗同陳芷尤喺當地市中心搵嘢食，由於四周都係外國人，二人放下戒備，陳芷尤仲繑實男友手，喺一間餐廳門口睇menu。梁小姐表示：「見到佢哋已經夜晚7點，兩個都係着住情侶牛仔裝。佢哋應該打算搵餐廳食晚飯，見佢兩個買咗好多嘢，男仔就負責拎幾袋戰利品，唔使女友拎。」不認不認點都要認o架啦，事關二人孖住去旅行，早已喺Ig露咗端倪。事緣日前張振朗放咗張戴住黑超着住牛仔衫褲嘅相上Ig，驟眼睇冇乜嘢，但眼利嘅網民，喺眼鏡倒影中見到陳芷尤嘅身影，咁啱陳芷尤又喺Ig貼咗張着住牛仔服嘅相，斷到正一正，想否認都難。問到係咪同陳芷尤拍拖歐遊，張振朗就回覆傳媒話：「多謝關心，我哋玩得好開心。」咦咦！「我哋」算唔算默認呢呵！據知，張振朗一年未放過假，連拍兩套劇，早前趁著《全職沒女》宣傳過後，向公司請假十日到歐洲自由行，今次係佢第一次到歐洲旅行，仲同埋女友同行，其間二人睇到新聞話英國發生恐襲，所以佢哋去旅行之餘都份外小心。返港之後，張振朗隨即要返回劇組，開拍重頭劇《飛虎極戰》。
|
鍾意就快D Share啦！
|
|
|
