入行10年都係得個吉、搵朝唔得晚嘅「大眼妹」江若琳（Elanne），好日唔返嚟香港娛樂圈，一返嚟就玩爆閃晒愛，生擒相識10年嘅「生煎包王」蕭潤邦（Oscar）！先唔講「生煎包王」Oscar有咩把炮將「大眼妹」追到手，兩個人將10年友情變做戀人，真係好講Timing，是但一方有拖拍都成唔到事。年前同內地相聲演員曹雲金甩拖嘅Elanne，嚟緊9月就踏入「29+1」嘅「中女危機」，正如口痕友話齋：女人有嘅「條件值」會隨住年齡增長向下Drop，唔識自我保值，分分鐘跌到去負值，所以Elanne今次確實睇準時機入咗隻「藍籌股」揸手等收息。
對Elanne嚟講，Oscar正正係佢嘅「藍籌筍盤」，點解咁講？因為佢過去情路屢次錯摸，正所謂愛一個上一課，經過幾段情傷令Elanne擇偶別有一套，儘管你係富二代，Elanne都未必放在眼內，佢仲寸爆啲公子哥兒話：「富二代冇乜『營養』，淨係講飲咩紅酒、揸咩靚車，我係想有人同我傾到偈，係心靈上嘅交流。」
裸辭轉行有奇迹
富二代有營定冇營，Nuts哥覺得可圈可點，有父母支大水喉射住，「營養」一定超晒標，唔係都唔叫富二代只不過佢啲「營養」唔一定要同你共享，現實啲講，100蚊，佢手指罅流得1蚊畀你使都係嘥鬼氣。Nuts哥認識嘅Elanne係有性格嘅烈女，條頸仲硬過舊石頭，要卑躬屈膝侍奉啲仲飲緊阿媽奶水維生嘅公子哥兒，又點會受得住！相反有個人搵10蚊，會畀9蚊你使，1蚊仲要叫你幫佢儲起，呢個愛做實事嘅高佬Oscar就啱晒Elanne嘴形。
原本玩音樂嘅Oscar當年「裸辭」娛樂圈，毅然走去做廚房佬，由零開始學搓粉整生煎包，用一雙手、一間舖起家，苦幹7年賣包有成，今時今日已係7舖老闆，仲準備開多兩間擴大佢嘅飲食版圖，開到總有一間喺左近，大有機會賣包賣到上市，話唔埋好似之前一間米線舖咁，被日資睇中出價10億港元收購，到時Oscar 真係一夜富貴，身家億億聲，Miracle呢樣嘢就喺你估唔到下發生。
有膊頭至係真男人
至於大眼妹戀上廚房佬呢個愛情故事，對全城單身男起莫大激勵作用，原來有個明星女友不是夢，唔一定要花美男外形或者富二代，男人要贏得芳心，有腦有事業心都未夠，呢個世代要有強而闊嘅膊頭，先係致勝招數，尤其對Elanne呢個咁需要安全感嘅女仔，佢要嘅係有擔當嘅真男人，Oscar 情深晒句「未來嘅日子我就係你嘅船、我就係你燈塔、連岸都係我！」呢個仲唔係為Elanne 度身訂造嘅「營養餐」。
所以Oscar呢隻藍籌絕對係長揸有着數，Elanne亦唔介意大方認愛， 當然喺開心Share嘅背後亦暗藏「宣示主權」一面，免得一個唔該，呢個「優質股」畀人搶走，呢招喺「生煎包王」身上「打卡」，向天下女人宣布：「呢個男人係我嘅。」Elanne仲頻頻落男友舖頭打躉，人前人後都嗌佢做「老闆娘」都咪話唔爽喎！
|
鍾意就快D Share啦！
|
|
|