為定慧寺官司耗數百萬 復出搵錢
翁靜晶嫁女從簡「冇能力畀酒席費」
一代宗師劉家良遺孀翁靜晶昨日踏入53歲，她於兩年前怒揭定慧寺家醜打官司，由當初的捐款、維修至今日的官司費，加上預計官司要打十年，費用高達數百萬，還要應付細女劉幸儀的婚禮使費，為免面臨山窮水盡的危機，已經退休的翁靜晶惟有重操故業當律師，馬死落地行的她矢言：「我唔會退縮，呢個係正邪之間嘅決斷！」
翁靜晶曾捐款助定慧寺，之後揭發定慧寺家醜而對簿公堂。資料圖片
翁靜晶於84年嫁給年長30歲的劉家良後，二人育有兩女萬儀和幸儀，婚後退出娛樂圈的翁靜晶一度轉做保險業，其後在香港大學專業進修學院修讀法律，考獲律師資格成為執業律師，直至50歲因甲狀腺功能減退提早退休。翁靜晶因為對社會不平事仗義執言，被網友封為「俠女」，她於前年揭發定慧寺的醜聞，身為董事的她狀告上高等法院，跟住持釋智定及其兩名和尚老公打官司，由於所有費用都靠她支付，令自己陷入財困危機。
翁靜晶曾為定慧寺規違事件，尋求梁耀忠議員（左）協助。
為籌錢打官司，翁靜晶冇錢付細女劉幸儀的婚禮使費。
釋智定捲入假結婚及擅自挪用寺廟捐款事件。資料圖片
「馬死落地行」
翁靜晶曾捐出52萬給定慧寺，又付維修及安裝冷氣費，而官司才開始已耗了數十萬，花在定慧寺的近百萬費用如倒水！日前翁靜晶接受本報電話訪問更揭露隱憂：「08年定慧寺有斜坡工程需要進行，但一直遲遲唔理，於是政府代支，合共200萬左右。」為原則問題，翁靜晶拒用善信捐款還給政府，她無奈說：「好大可能先由我畀200萬，起碼解決件事。所以呢，我一定要出返嚟做嘢，唔可以坐食山崩。我退休嗰陣，計過啲錢夠用，但𠵱家睇嚟計劃有變，所以我搵咗工喇，7月就返工。」
翁靜晶預計要用十年時間打官司，她說：「錢嗰方面我會努力去籌，唔會退縮，呢個係正邪之間嘅決斷，我唔可以放棄，做人就要承擔，我可以賣樓，但我仲做得，我可以去返工，馬死落地行，打工唔係壞事，如果發生喺70歲就話驚箒。」為了應付龐大的官司費，翁靜晶無奈委屈細女幸儀的婚禮，她說：「我個女諗住結婚，佢嫁西人，依照西人習俗女家要付酒席費。我暫時係冇呢個能力畀酒席費，又要去顧住定慧寺欠債，又要畀酒席費，我一定要做嘢。」幸好女兒明白，所以婚禮從簡，她說：「都冇辦法，為咗公義，你都要犧牲。」
翁靜晶與劉家良育有兩女，原本退休的她準備復出。
轟劉江華懶
雖然有網民發起夾錢給她打官司，但翁靜晶認為事件因她而起：「我要一力承擔，唔想連累市民幫我捐錢。」其實事件還有折衷方法，就是由華人廟宇委員會負責接管。日前翁靜晶在社交網表示，曾透過梁耀忠議員約見「華人廟宇委員會」主席劉江華，但對方避而不見。翁靜晶怒轟劉江華：「全香港最懶的局長」，更懇求「炒了劉先生吧。」她說：「佢覆信叫我去報警，係咪黐線㗎？我哋畀佢係一個正資產，唔係負資產，但點解你唔去接收呢？原因就係懶囉。」
採訪：嵐山
|
鍾意就快D Share啦！
|
|
|