藝人周秀娜（Chrissie）今日出席又一城出席「快易通會員獎賞計劃」啟動禮，並在台上與主持分享駕駛蝦碌史，她表示：「自己試過喺迴旋處被困3小時，係咁轉，想出番去又出唔到，永遠去唔到自己想去嘅地方，但依家好啲囉，2個鐘就得。」她又跟星級魔術師張哲銘一同表演三個魔術，魔術師力讚Chrissie是可造之材，可成為「魔術女王」。
「自己都好擔心」
Chrissie表示昨晚剛從佛山拍攝電影回來，表示自己雙腳紅腫：「係拍動作戲，有啲被捉被打嘅戲分，但唔算話好多動作，之後開咗工1日之後發現自己痛，開始紅，工作人員提我隻腳腫咗，開頭坐底起身都冇特別嘅，但用力就會痛，慢慢就嚴重。（維持幾耐？）睇完醫生，食咗幾日藥，維持咗都4、5日。（醫生點講？）我都唔知，自己都好擔心，諗緊係咪關韌帶事，有幾次因為坐完飛機，坐車坐得太耐，血液唔循環搞到咁，但未試過今次咁兩隻腳都有事，又未試過紅到會蔓延上去，所以我都擔心係咪因為拗到變成咁，醫院檢查完發現原來韌帶發炎，開頭仲驚係咪食錯嘢，或者係咪畀啲蟲咬到，因為個地方係樹林嚟，所以都擔心，第二日又未好轉，即刻去睇急症。（有冇影響拍攝進度？）冇呀，我覺得我好似皇帝式享受咁，因為第一日開工要跑、要走同試位，好混亂。之後第二日可能大家都知就隨時變到張櫈出嚟，因禍得福。又可以轉着波鞋，因為本身着平底鞋，其實唔見腳就着得，會舒服啲。（暫時唔着得高踭鞋？）依家都未完全好番，之前腫得好犀利。」
「我唔算女主角」
而Chrissie表示明天便要到馬來西亞拍攝電影，她說：「因為暫時只完成一部分，聽日就走。（留得一日？）係，我好掛住我隻貓。我聽日會去馬來西亞，因為嚟緊就套新戲會去嗰度拍。（仲有咩演員？）我仲未見到佢地，好高興可以同有張智霖、吳鎮宇合作，同埋係一個好串連成個故事嘅角色，（即係女主角？）又唔算女主角，因為有佘詩曼。」
買樓要深水灣
問到現時有很多人到馬來西亞買屋，因為便宜，她表示要詢問前輩意見：「我覺得係香港置業太貴，好難上車，如果其他地方，我覺得最重要係負擔得到係一個選擇。（咁你有咩心水地方？）我想留喺香港，心水咁不如深水灣啦。」
|
鍾意就快D Share啦！
|
|
|
