萬梓良近年甚少參與港產片演出，較近的電影作品經已是12年參演《懸紅》及13年參演《古惑仔：江湖新秩序》，今次跟一部由出品人至導演、演員及幕後都陌生的人合作，原來背後有段故仔。萬子日前於觀塘接受訪問，談到為何相隔幾年才有一部作品，他哈哈笑說：「冇乜人請！」為何今次一部港產片《今晚打喪屍》能打動他呢？近年長居內地的萬子，有日收到邀請，原來是香港有電影出品人、導演及編劇有意找他演出，萬子說：「佢哋好有心，經好多人輾轉搵到認識我嘅朋友再聯絡我，咁我就約咗個時間返香港傾。」回港傾談當日，面對着一班素未謀面的幕後，萬子坦言對香港電影經已生疏，但傾談過程感受到他們對電影的熱誠，兼且原來面前的年輕人均是他的影迷，對自己以往作品有深刻印象，萬子笑謂：「佢哋好希望同我合作，最後我用咗去兩次洗手間時間去諗，然後返埋位就答應演出。但最重要係時間，因為近年健康情況唔好，有糖尿病。」萬子希望每個作品都能以最佳體力精神演出，不負多年支持觀眾影迷，所以每次要訂明工作時間，讓他準備今天是六小時還是十小時。首次接拍喪屍片，豈不是要經常進入瘋癲狀態不停走避？萬子透露自己戲份甚少需要走避，動作場口都集中在結尾場口，但都要跑了兩晚。憶起這兩晚演出，萬子指辛苦了戲中兒子白只及世姪張繼聰，他說：「嗰場戲喺街市拍，現場佈滿反應彈，所以拍攝時要一take過，導演嗌開始，佢哋兩個就扶住我跑，旁邊啲菜同食物就炸到亂飛，我夾喺中間，咁佢哋就幫我擋晒，尤其白只要保護爸爸就中得最多。」跟兩位後輩張繼聰及白只首度合作，萬子指由於大家都是King Sir鍾景輝的學生，所以一開始已經有共同話題，另外亦有留意兩人演出作品，而最有趣是第一日開工，當自己坐在片場等時，白只匆忙在身旁經過埋位化妝，當工作人員通知他萬子在場時，白只就立即起身到自己面前九十度躹躬再叫「前輩」，那刻就感覺這後輩非常有趣。戲中張繼聰跟白只是一對好兄弟，現實生活中兩人相識超過二十年，多年來有否試過跟戲中一樣要攜手合作克服問題？白只憶述大家修讀演藝學院時第一次合作，他說：「嗰次我同阿聰一齊飾演一頭長毛象，我哋一齊扮頭同埋尾，我都忘記故仔講乜，剩係記得好辛苦好焗，隻長毛象好似地氈咁舖實我哋。我記得有一場我一離開舞台我就暈，可能血糖太低好凍，然之後我同阿聰講，你瞓上嚟，我大字型咁瞓，佢就大字型咁瞓喺我上面，就咁救番我。」跟萬子合作，白只表示完全感受到甚麼叫氣場，最記得第一次對稿時，聽到萬子哥讀出對白時，便完全感覺到這便是戲，白只說：「萬子哥就似一個舵手，有佢帶領住，尤其我就有個跟住對象，而每一個鏡拍完都唔係望導演先，係望萬子哥先睇下係咪收貨。」阿聰指最深印象是一場萬子哥獨自近六分鐘的戲，現場環境又熱又焗，但從鏡頭中深深感受到演員在鏡頭前的力度，這已經不是演技，而是跟鏡頭融為一體，他說：「呢份態度令我立即學到，都真係遇到好攰時候都唔好爆話辛苦，耐心啲去繼續做。」原來在街市走避喪屍一幕有小故事，就係三人等埋位經已等到深夜好攰，但導演一叫埋位，萬子哥就捉住兩人大叫「畀個好嘅」，然後埋位拍，那刻兩人指感受到「成吉思汗」在旁。撰文：君喬
攝錄：Teddy
攝影：仇志德
場地鳴謝：TOWARD Studio
|
鍾意就快D Share啦！
|
|
|