掃呢頁CODE去手機

2017年6月26日 星期一

【獨家】周柏豪新婚索妻曝光 兩公婆搭枱快食平民米線 __,柏豪,周柏豪,

舊年11月,32歲周柏豪唔聲唔聲,同拍拖超過10年嘅女友Stephanie,秘密喺布吉結婚。事業正係衝緊之際,周柏豪忽然成為人夫,對此,唔少人都好詫異 ...


舊年11月,32歲周柏豪唔聲唔聲,同拍拖超過10年嘅女友Stephanie,秘密喺布吉結婚。事業正係衝緊之際,周柏豪忽然成為人夫,對此,唔少人都好詫異。不過周柏豪當時就話:「我一直想好好保護我的家人,不被我的世界而影響,對,她是周太,是最好的,我會繼續好好的保護她。」(新聞連結:http://bit.ly/2gsfTME )話明要保護老婆,做咗半年人夫嘅周柏豪,莫講話同老婆度蜜月,就連出席公開場合,兩公婆都鮮有合體。不過低調還低調,醫肚都好緊要,日前讀者林小姐透過《蘋果》「爆相爆片」,影到周柏豪同老婆,喺筲箕灣東大街食酸辣米線。林小姐表示:「嗰日(7日)見周柏豪同老婆入咗去間比較平民嘅米線舖食晏。其實間舖好細間,得5、6張細枱,不過佢哋都唔介意搭枱。見佢哋都幾煙韌,周柏豪久唔久都會夾餸俾老婆,老婆又遞紙巾俾佢。佢哋食咗大約20分鐘就走人,周柏豪負責埋單,不過見佢好似冇帶散紙,就問咗老婆幾十蚊找數,兩公婆有商有量。」林小姐話食麵前一直戴黑超嘅柏豪,到碗麵嚟嘅一刻,先除低副太陽眼鏡埋首食麵,可能因為咁,舖頭入面冇人認得佢,亦冇人搵佢簽名影相,到起身離開舖頭一刻,戴番副超嘅柏豪,就嗱嗱聲同老婆上番泊喺附近、價值近百萬嘅Benz四驅車。外型花弗,實則內裏深情嘅周柏豪,曾經講過對太太一見鍾情,早排佢開演唱會,喺台上多謝老婆話:「當時我好瘦,佢(老婆)仲稱呼我做瘦奀茄,我自己好多嘢都唔識,塊面爛晒,自己又有驚恐症,9個月冇出街,佢畀好多鼓勵我,我嗰時就喺屋企學琴學寫歌。」周柏豪喺零收入嘅時候,經濟上都要依賴太太:「我送唔到嘢畀佢,惟有寫歌畀佢,有時半夜情緒唔好會叫醒佢,對住佢唱歌,都十幾年喇,到o依家都好似初相識咁。」柏豪仲話同老婆一齊10幾年,相處之道就係包容,所以咁多年嚟,二人都好少鬧交。(新聞連結:http://bit.ly/2rMkDS2 )

柏豪泊車,老婆就先搵位。(讀者提供圖片) 食肆細細,搭枱都冇所謂啦。(讀者提供圖片)
(讀者提供圖片) 一人一碗米線,仲叫多咗碟小食。(讀者提供圖片) 當然要夾餸俾老婆啦。(讀者提供圖片)
埋單時唔夠散紙,要老婆掏荷包。(讀者提供圖片) 臨走戴番副黑超。(讀者提供圖片)

來源 source: http://s.nextmedia.com
鍾意就快D Share啦!