組合E-Kids到上環出席「生命天使UNSDG器官捐贈獎勵計劃啟動禮」，問到成員阮民安（Tommy）成為人父後首個父親節感覺如何？他表示活動很有意義所以特別開心，林詠倫（Alan）即笑他要為兒子積福，Tommy笑說：「做得衰嘢多！一早起身就出席咁有意義嘅活動，平時呢啲鐘數第一個身都未轉。」而郁禮賢（Kasa）就透露上星期已跟家人吃飯慶祝，又指家人已年屆5、60歲，所以吃得較清淡。Alan坦言日日都是父親節：「因為我同屋企人一齊住，出咗糧最開心就係畀家用。（咁多年都冇畀過？）有，不過今日多啲，有鮑魚食有蒸雞食。」
唔願講湊仔
問Tommy湊仔的情況，Kasa大爆：「我聽聞佢尿片都未試過換！」Tommy反擊：「你成日都聽聞！（事實係點？）係有啲改變。不如講呢個活動，我覺得幾好，我哋曾經都有親人離開，就發現呢樣嘢（器官捐贈）對病人係好重要。我哋三個今日成為器官捐贈者，希望大家見到我哋傳遞咁嘅訊息都支持吓。聽到啲分享，有家庭（有事）咁點算呢？都要check一check，原來好健康都會有呢啲情況發生。」Kasa笑說：「啲人成日問點解E-Kids仲未死，咁未死我哋就做番有意義嘅嘢，如果死咗都好有意義喎。」Tommy笑言：「但你哋死極都死唔去喎。」Alan抵死說：「唔緊要啦，我會幫你哋兩個搞㗎」
開騷Cap水？
提到Kasa太太將於7月生B，他形容太太的肚已經很大。Alan就爆全公司都要遷就Kasa：「本來我哋出埠拍MV，依家全部都要睇佢頭。」Kasa表示下年農曆新年前會到麥花臣開騷，25號會拍MV，之後就等太太生完B，8月才出發拍另一個，他很多謝公司，透露與太太參加了育嬰班，學習如何餵人奶和換片，又爆Tommy飲過人奶：「你話好飲嘅！其實我好驚幫BB沖涼，到時真係會問Tommy。」至於近日Alan求婚成功，他直言不知何時舉行婚禮：「死啦，又要等佢生B，MV又未拍，跳舞學校又啱啱起步。不如三個一齊擺酒，跟住整個演唱會cap水！」
|
鍾意就快D Share啦！
|
|
|
