自知身有屎，行唔夠幾步，李潤庭亦擰轉頭望一望。
娛頭
《東張》大話賤男話想同老婆復合 李潤庭繼續同小三劏房培慾
《東張西望》主持李潤庭因為衰背妻偷食，仲要被本刊圖文並茂踢爆，賤男形象衰到貼地，結果被大台雪藏四個月，更窮到要搬往灣仔住百多呎劏房單位。
上月剛復工，重返《東張》做主播，當時李潤庭接受訪問時才表示今年生日願望是希望氹回老婆，表面扮有誠意努力箍煲，但原來同人妻小三 Tiffany仍未斬纜，上月 3日，本刊發現 Tiffany晚上九時多，一個人坐的士去到李潤庭劏房寓所，同情夫禁室培慾！
偷食令事業婚姻一鋪清袋，李潤庭仍不知悔改！
激嬲父母
李潤庭因為背住空姐老婆 Crystal，搭上人妻兼人母小三 Tiffany，令形象破產被飛出《東張》主持工作，今年四月復職，初期只係負責出外景訪問，直至六月重返主播台，不過復工即被網民鬧爆，負評一大堆。
停工四個月，李潤庭收入近乎零，加上空姐老婆已搬走，無法獨力承擔租金，近月已搬離荃灣愉景新城寓所，搬到灣仔月租六千，面積只有百多呎的劏房居住。
「一路以嚟，老婆 Crystal都有幫補家庭開支，但自從老婆搬走咗， Eric無乜收入，惟有慳得就慳，加上偷食件事，佢激嬲埋住加拿大嘅父母，依家幾唔掂，父母都唔肯幫佢！」知情者說。
今年五月三十八歲生日，李潤庭有份出席電視城「五月星辰」活動，對於被解凍，公開表示會醒醒定定，還透露正努力同老婆箍煲。
繼續玩火
「老婆仍未搬返屋企，我希望用時間去補救，令佢可以睇到我的誠意，我今年的生日願望是希望氹番佢！」李潤庭說。
把口就講到自己浪子回頭，以為李潤庭真係知錯，但原來只係大話冚大話，一方面死𦧲扮改過呃住老婆，但原來同小三人妻仍未斷，保持來往繼續玩火。
六月三日，小三 Tiffany一個人坐的士去到灣仔，落車後入了便利店買飲品，同樣係背住老公出去偷食，所以 Tiffany買嘢期間亦非常緊張四圍望，一副偷情樣擺明身有屎，買完嘢就急急腳轉去後面街，獨自上李潤庭的劏房寓所， Tiffany似乎非常熟架步，上到該樓層就十分熟路行到去李潤庭所屬劏房單位，而且她有鎖匙，可以自出自入，當晚他逗留到凌晨都沒有離開。
六月四日，李潤庭同小三短敍完開心一晚後，他獨自落街去附近茶餐廳食麵醫肚，都係幾條街路程，全程都高度戒備，行到十字路口又專登停低玩電話，但就用對眼不停四圍掃，神情緊張，在茶餐廳吃麵吃了半小時，離開鋪頭行返屋企，又突然行捷徑，還專登行過龍，之後再行返轉頭，返屋企啫，都似足做賊！
冇工開坐公園
因為有老公又有仔女， Tiffany只係間中偷會賤男，其餘時間李潤庭都係食自己，由於工作量不多，李潤庭每星期會去做 gym消磨時間，有時更無聊到要去寓所附近的公園睇阿伯捉棋同坐埋一邊玩手機，生活枯燥兼無聊。
上週六（七月十五日）晚上七時，李潤庭單獨返回劏房單位，一小時後小三 Tiffany乘的士去到灣仔，在李潤庭屋企樓下的茶餐廳買外賣，其間更用手機影低餐牌，然後 send相問對方想食什麼，相信電話中人正是情夫李潤庭，買完外賣後 Tiffany就同平時一樣自己上劏房同李潤庭禁室培慾。
朋友走晒
因為偷食事件令到李潤庭被雪藏之外，亦因此令他眾叛親離，大半個月以來，只有一日約了一班朋友外出晚飯。
「背住老婆玩女人，無恥到咁，之前班有線 friend，都唔敢約佢搞到山窮水盡，朋友走晒，都係佢自己攞嚟嘅！」李潤庭身邊人說。
好彩屬於余詠珊幫的李潤庭，都仲有高層射住，就連背妻出軌事件爆煲，大台亦安排記招讓他交代事件，可惜道歉時態度毫無誠意，再遭網民抨擊，但當時余仍力撐他，「唔覺佢無誠意！」就算賤男形象仍未洗底，都係咁意雪藏四個月就獲得優待解凍。
小三有老公
偷食事件爆出後，李潤庭被網民狂插，小三 Tiffany即被起底， Tiffany與正印同任國泰航空公司，目前已辭職，同樣已婚的 Tiffany，育有一子一女，平日有司機接送， Tiffany丈夫何俊傑 Gregory 38歲，為一間中油港燃能源集團控股有限公司上市公司執董，單是持股市值已近 800萬，曾是多間上市公司董事，於澳洲莫納什大學會計學士畢業，經常要往返內地， 11年與 Tiffany結婚，一家居住於元朗溱林。
雪藏四個月
15年，李潤庭由有線過檔無綫主持《東張西望》，去年被爆背妻偷食，一夜成名變賤男，形象插水，被無綫雪足四個月。
2016年 12月 8日
被踢爆背妻偷食，趁着空姐太太 Crystal不在港，即與小三 Tiffany秘會，於赤柱大街攬腰摸 pat兼濕吻，更狼死到帶埋小三回家。
2016年 12月 9日
翌日，李潤庭返港即被高層照肺，並開記者會交代事情始末，除了道歉兼再度鞠躬， 6次強調「係我嘅錯」，他亦自爆老婆選擇離婚，父母亦嬲爆未有與他聯絡，與小三 Tiffany斷交。
2016年 12月 15日
賤男形象插水，無綫即時送他入雪櫃，原先接下多個聖誕及新年司儀 job搵真銀，更全部被飛。
2017年 3月 4日
停工三個月，終於有個商場司儀 job，李潤庭直認冇工做收入減少，並表示現時獨居但有跟太太見面。
2017年 4月 3日
被無綫雪藏四個月，李潤庭正式復工《東張西望》，大台安排他先跑突發外景試水溫，重新出發，並坦言：「過去四個月好難捱，唔止經濟壓力，同時亦冇咗人生目標。」更表示希望太太原諒，要俾心機恢復太太對佢的信心。
撰文、攝影：娛樂組
|
鍾意就快D Share啦！
|
|
|