渣甸山居民協會（黃箭嘴）雖由一班第一代香港富豪組織而成，但缺乏凝聚力，且設施殘舊，最終被政府收回土地不再續租。
中環人語
林鄭上場即「郁」富豪俱樂部
渣甸山業主非富則貴係人都知，不過喺山腳嘅「渣甸山居民協會」就非常潦倒，即將被政府收回，呢個以私人遊樂場地契向政府租地嘅「俱樂部」，一九八一年以每年一千元地價批出，由創科局局長楊偉雄外父——翁祐牽頭成立，名譽會長粒粒皆星，不過尚在人間冇乜幾個，仲有賭王何鴻燊及胡應湘等，隨着翁祐早年在家中「掛臘鴨」過身，呢個位處高貴地段富人俱樂部就冇人揸弗，財政狀況唔多理想，連修葺後面斜坡都冇水，最後要政府收拾這個爛攤子，支付六百萬元維修費。
協會入面嘅設施亦十分殘舊，二○一一年地契已到期，但遲遲都未獲續約，卒之林鄭上場後，政府就來個了斷，把土地收回！嗱，呢一着住喺渣甸山上嘅富豪又可能腳軟，塊地收回之後拍賣的話，如批准起高樓，咁就變咗支「頂心杉」！首當其衝之富豪，乃是搬咗去高士美道二至三號嘅大劉，不過佢喺渣甸山頭咁多物業，住邊間都得
中環寸嘴 「指點」都係擦鞋
工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。
林鄭訪問新加坡公共服務學院，話係向新加坡「偷師」，呢個字眼似乎「有傷大雅」，嗱，佢啲新聞官點解唔教佢用「取經」、「觀摩」或者「交流」呢啲字眼，起碼冇咁「鬼祟」吖，「指點」都係擦鞋，袋錢落你袋又唔知！
好似我喺鏞記，一指又點中掛喺度嘅「金華火腿」，千鬆啲蚊一隻，抵吖，立即買隻返去，叫伙記同我切開十件，分俾親朋戚友，熬上湯冇金華火腿點會惹味？我睇鏞記唔係擺好多嚟賣，賣唔晒佢自己都用得着，好彩我「知尺寸」，切完之後再望真啲，要伙記彈鐘再將豬手切三份，如果唔係攞到返屋企，賓妹都幫唔到你。即係等如蒸魚咁，講乜都係假，一碟大酒樓嘅蒸魚同賓妹蒸魚係有分別，（註：須知道賓妹喺大陸薪酬有成萬五蚊，貪可以同細路講英文，前提係唔介意成口菲律賓口音），蒸魚點為之掌握到個 timing？嗱，就係要啱啱魚骨有少少血絲，咁為之啱啱好，否則就過火，再自己執生，淋啲魚汁喺上面，不過唔識嘢啲友以為未熟，以為人哋俾「渣」嘢佢食，所以話冇知音人都死㗎！
陽明山莊祖先光照
南區豪宅，大潭陽明山莊（ Hong Kong Parkview）發展商——僑福集團創辦人黃週旋，雖然過咗身十幾年，其第三代將 Parkview呢個朵搞得有聲有色，喺星洲 Bugis地鐵站旁起咗幢 Parkview Square，由佢孫女黃詩涵（ Vicky Hwang）主理，以上世紀三十年代紐約情懷為建築風格，入面仲有個私人博物館，公眾免費入場。最為矚目是地下 Atlas酒吧，號稱是全世界存放最多種類「毡酒」，裡面個十五米高「酒塔」，可存放一萬支酒。早前喺邵逸夫個孫女婿嗰間法國餐廳 Les Amis，挖走咗個 Sommelier Mason Ng過檔做阿頭，環顧呢個咁雄偉嘅 Gin Bar，精髓是正中嘅一幅手繪人像，正是僑福創辦人黃週旋，所以話後人搞生意，唔搵祖先照住點得？
|
鍾意就快D Share啦！
|
|
|
