36歲藝人陳茵媺（Aimee）於2013年與陳豪結婚後，四年抱三共育有兩仔一女，而一直愛演戲的她，自有了小女兒之後，便一直沒有再接戲，直至今日終於正式復出，拍攝英皇電影《日月星》，在戲中將飾演女教師的她今晨十一時抵達中環髮型屋，經過四小時變身之後，把原本的啡髮染成黑色並剪短，Miss味出晒嚟。
剪完髮之後，她步出髮型屋接受媒體訪問，對於「復出」，她笑言：「好興奮呀！等咗好耐想復工，今次係新嘗試、新角色，做老師教書，我之前未試過呢類角色，我未去多倫多之前都同導演溝通咗好幾次，臨飛前都有keep住開會，並且落實拍呢部戲，我亦特登提早小小返嚟，配合電影公司嘅時間。
開工會否掛住小朋友？陳茵媺謂：「會呀，今日我出門口，佢哋都問我去邊同埋可唔可以陪我嚟，我當然會好掛住，但都ok嘅，因為依家老公喺屋企，一陣我做完嘢再返去接番班。（盡量想安排你或者爸爸喺啲小朋友身邊？）係呀，盡量。」
同老公鬥操肌
陳茵媺指今次接演新戲，都花了不少心思，在加拿大多倫多都不停keep fit，她謂：「好期待開工，喺多倫多都keep住做運動，大約一星期都會做五、六次，食嘢亦盡量健康啲。（向老公請教嘛？）無錯呀，我同佢鬥緊，睇吓邊個腹肌最大。」
買好多手信畀老公
陳茵媺帶兩仔一女到多倫多度假期間，留港開工的陳豪，不時隔空向老婆送驚喜，令陳茵媺冧爆，她謂：「佢好掛住我，我都好掛住佢，佢亦有驚喜送花。（仲有冇送其他嘢？）我覺得唔需要送太多嘢做表示，最緊要係大家保持聯絡，永遠最sweet嘅都係說話上。（有無買乜嘢手信畀老公？）買咗好多，加拿大太多好嘢買，尤其依家，有好多加拿大用品啱佢用，幫佢keep fit。」陳茵媺指現在還有小小時差，而昨晚老公來接機回家後，三個小朋友都嗲爆陳豪，亦有唱歌仔畀陳豪聽。
今次復工之後，陳茵媺笑言希望工作陸續有嚟，她謂：「希望可以繼續接戲，因為我有少少工作狂，希望時間上配合得到，一路湊小朋友一路工作，小朋友九月開學，我今次拍戲亦差唔多嗰個時候完工，到時可以做司機車啲小朋友返學。（係咪希望盡量自己湊番？）盡量配合，因為我同老公嘅父母都唔喺香港，都想自己湊番。」
|
鍾意就快D Share啦！
|
|
|
