探熱針
過氣特首生活 曾蔭權 G4護送買鹹鴨蛋
林鄭月娥成為新一屆特首，之前的三位過氣特首，再沒有官職在身，生活變得平民化，好似第一屆特首董建華，年屆八十歲，同老婆趙洪娉依然恩愛，加埋成一百六十歲，都拖手行置地。
而因為被判公職人員行為失當罪名成立的曾蔭權，就趁住這段等候上訴期間，爭取同家人相處機會，更貼地到親自落中環買鹹鴨蛋。
卸下煲呔
第二屆行政長官曾蔭權，被判公職人員行為失當罪名成立判刑二十個月，成為香港有史以來首個因為在任期間觸犯刑事罪行，而被判處入獄服刑嘅前任最高級政府官員，服刑兩個月後在四月底獲准保釋等候上訴，九月二十六日會再開審，等候上訴期間，曾蔭權當然要好好享受呢段自由時間，帶埋親戚同老婆去中環行街。
曾蔭權在任期間，幾乎每次都會戴住招牌「煲呔」出席所有活動，「煲呔」就好似象徵住佢嘅特首身份，但被判公職人員行為失當，曾入獄的曾蔭權滿頭白髮，無再戴住「煲呔」睇落去蒼老不少，但仍然著住西裝外套現身中環。
送老人家搭巴士
日前《壹》仔見到曾蔭權同太太曾鮑笑薇，連同兩個 G4保鑣，在下晝三點現身中環皇后大道中，一行四人先去恒生銀行嘅私人理財中心，逗留了三十分鐘，可能係因為就快又開審，要處理好啲個人財務。之後就上咗隔籬陸佑行，過咗無耐佢哋接咗一個老人家落樓，雖然老人家身邊本身已經有個工人陪住，但曾蔭權兩公婆都好主動咁去扶實老人家。
佢哋一直沿住 Landmark行，行到去一個巴士站就停低，陪個老人家等巴士，等車期間有途人認出曾蔭權，走咗上前同佢打招呼，仲同佢傾咗陣偈，最後個女途人送咗本書俾曾蔭權然後離開，等咗大約二十分鐘，婆婆就上咗架 88R往沙田第一城嘅巴士離開。
親自買鹹蛋
送完老人家上巴士，曾蔭權同太太仲有兩個保鑣就繼續出發，行到去嘉咸街入了一間專賣調味料興隆醬園，買了四隻咸蛋同辣椒醬，卸下「特首」職位，曾蔭權做事親力親為，買完嘢全程自己拎，無假手於人。之後佢哋一行人就上咗政府 AM車牌嘅七人車走人，距離九月二十六日又再開審，曾生趁這段時間較得閒，爭取同老婆相處機會。
董建華又行中環
至於另一位前特首董建華，同樣在中環出現，《壹》仔見到他帶埋老婆現身中環 Landmark，呢日大概下晝四點幾，佢同老婆拖到實行街，原來佢同老婆兩個今年都已經成八十歲人，但都依然恩愛，真係不得了。不過 A1果然係 A1（當年有報導指董太坐飛機時，指定要坐頭等 A1位置），都已經八十歲人，戴上黑超再繑埋雙手嘅佢依然係氣勢凌人，唔知當年佢要求坐 A1嗰陣係咪都咁霸氣呢？回歸正題，身為前特首又係全國政協副主席嘅董建華，身邊梗係有保鑣跟實保護安全，同老婆拍住拖行咗一陣，佢哋兩個就出咗置地門口上咗架政府車離開。
至於梁振英卸任後，主要任務是陪女兒齊昕醫病，早前他與齊昕放狗期間，疑似踩中「地雷」。
曾蔭權入罪過程
2012年 2月
被揭發接受富豪款待，包括乘坐私人飛機及遊艇；此外亦出席了澳門娛樂場貴賓廳的活動。
2017年 2月 22日
判刑 20個月
2017年 4月 24日
獲准保釋出監等候上訴
2017年 9月 26日
上訴開審
特首退休福利
曾蔭權公職人員行為失當成立理應被去除所有特首退休福利，但因現時仍在等候上訴階段，所以他仍可享有原本福利，現時出入仍有政府汽車連司機服務及保鑣保護。
1. 可使用位於中環堅尼地道的前任行政長官辦公室。
2. 提供汽車連司機服務。
3. 出入有保鑣保護及住所保安安排。
4. 前特首及其配偶使用香港國際機場貴賓室。
5. 前特首及其配偶可享有終身的醫療牙科福利， 21歲以下未婚子女亦受惠。
撰文、攝影、攝錄：娛樂組
|
鍾意就快D Share啦！
|
|
|
