今年54歲嘅鄭敬基(Joe)，舊年迎娶細自己19歲嘅教友Angie，雖然年齡有差距，不過天生童顏嘅Joe，拍埋嫩妻身邊，依然好合襯。做完新郎哥，Joe喜事接踵而嚟，先係今年3月，26歲囝囝鄭家揚Jonathan，喺悉尼大學碩士畢業，Joe到當地同囝囝影畢業相。到多倫多時間8月20日，Joe更加榮升做新老爺，Jonathan迎娶任職音樂治療師嘅女友Candice，Joe同太太當然有飛過去飲呢杯新抱茶。而咁啱呢兩日，Joe喺美國紐約登台，所以就將全數6位數字嘅歌酬，送畀阿仔當賀禮。喺當地時間20日早上，一對新人先進行斟茶儀式，Joe同老婆Angie，前妻同現任丈夫，以及新娘父母都有在場。而Joe就一反轉統，唔使一對新人跪低斟茶。完成儀式後，佢哋就喺當地一間教堂行禮。到晚上，新人同一眾親友、教友就到一間西式宴會廳舉行晚宴。榮升老爺嘅鄭敬基，今早越洋回覆《蘋果》時，就話飲呢杯新抱茶時，自己心情難以形容。Joe表示：「阿仔斟茶嗰一刻，中間真係會諗起好多佢嘅成長片段，本身有好多嘢想同佢講，例如將來佢點待人處事啦，點樣對太太啦，不過其實係唔使講，因為當中已經充滿住祝福，充滿主嘅平安，所以覺得呢一份係超乎想像嘅禮物，今日終於收到。以前喺多倫多生活，睇住阿仔成長，結果佢係一個好正義，好有分寸嘅男孩子，識到一位好好嘅太太，係佢嘅福氣，亦係我嘅福氣。」
|
鍾意就快D Share啦！
|
|
|