暑假尾聲，霍氏一家四口出發去溫哥華度假。
探熱針
首次曝光 慳家坐機鐵 郭晶晶霍啟剛 B女似足朱玲玲
「跳水皇后」郭晶晶嫁俾霍啟剛後一索得男，眨吓眼囝囝霍中曦（ Lawrence）已經四歲大。
今年四月晶晶再為霍家添丁，誕下 B女霍中妍，湊成「好」字。
趁暑假就快完，霍氏一家出埠放電，先去溫哥華，緊接返晶晶北京娘家探親，足三個月大的 B女首次曝光，手長腳長，眼大大，嘴細細，皮膚白白淨。睇真啲，原來似晒「最美麗嫲嫲」朱玲玲咁靚！
阿爺親自改名
貴為霍家「掌上明珠」，爺爺霍震霆親自為孫女改名。據知 B女英文名叫 Luarissa，源自拉丁文，意思希望 B女大個有主見、有創造力同判斷力，將來做領導者，可見 B女得寵程度。連一向低調的霍啟剛一提起個女都冧晒，仲忍唔住狂讚個女：「似我媽媽（朱玲玲）咁靚。」
「霍家一向男多女少，晶晶今次生女，最開心係佢老爺同奶奶，屋企第一個女孫，恨咗好耐喇！霍老爺而家一得閒就要去探粒孫。」知情者透露。
隔代遺傳
圈中不少星三代五官生得精緻可愛，但完全唔似爸爸媽媽，反而隔代遺傳，似爺爺。
李嘉誠
09年，梁洛施為李家添丁，誕下大仔長治，翌年再生一對孖仔，長治同父親李澤楷生得成個餅印一樣，而一對六歲孖仔 H&N，兩兄弟無論高度、樣貌都好似倒模咁，似足爺爺李嘉誠，難怪爺爺勒令，一年要見孫仔兩次。
巨 B曝光
平時出埠唔慣帶工人，不過今次湊住霍家「掌上明珠」，早前晶晶同霍啟剛一家四口出發去溫哥華，同行仲有工人姐姐同保母。 B女第一次坐飛機，兩公婆特別緊張，唔計寄艙行李，一人孭住一個大背囊，加一個手提行李，工人姐姐同保母又各拎一個奶粉袋，好大陣仗。
為避耳目，航班起飛前十分鐘，等其他乘客都上晒機，晶晶同霍啟剛校啱時間先到達閘囗，六名機組人員上前迎接，一馬當先的霍啟剛拉住設有 baby seat嘅手提行李，阿仔 Lawrence坐喺上面一邊咬住蘋果，兩腳 fing fing，好識歎！至於晶晶就負責推住 B女，出世時已經有八磅重的 Laurissa果然好足秤，手長腳長，好好肉地，絕對係重量級 BB。
遺傳媽咪運動 DNA， Laurissa好活潑，眼仔碌碌、手腳不停郁，不過，最得意係 B女唔似爸爸，又唔似媽媽，竟然似晒「最美麗嫲嫲」朱玲玲，五官標致。準備上機，晶晶抱起 B女交俾保母，自己落手落腳收起 BB車，一切準備就緒，晶晶即刻從保母手中抱番 B女先上機，果然親力親為。
貼地坐機鐵
溫哥華回港後，晶晶同霍啟剛緊接再飛北京，探望晶晶外家。由於行程緊湊，只逗留三日兩夜，為避免 B女太頻撲，今次只帶大仔 Lawrence出發，撇低 B女輕鬆得多，冇工人冇保母。
回程當日，霍啟剛孭住大背囊，晶晶就手拎一個 Longchamp大袋加一個 hand carry，好輕便，不過連日舟車勞頓，霍小公子全程雙腳唔肯着地，扭計要爸爸抱，唔使等行李，一家三口火速出閘，之後急急腳行去機鐵站。平時有司機接送，去到機鐵站，兩公婆似乎唔多識路，不停左望右望，最後成功搵位坐低。兩大一細搭機鐵，二百五十蚊搞掂！話晒係霍家頭號繼承人，霍啟剛真係夠晒貼地！
繼續生
產後三個月，有運動底子的晶晶已經回復元氣，連環出 trip依然面不改容，而且行動敏捷，不過就未收身，見她依然面圓圓，手腳有肉。據知晶晶一心要以奶奶朱玲玲做目標，就算成功追女亦未有打算封肚，至少生夠三個先收工。
「以晶晶嘅身體狀況底子咁好，稍為調理吓就得，所以佢都唔急，等阿女大少少先，佢而家先三十五歲，佢有信心四十歲前一定達標，生夠三個收工。」知情者透露。
野生捕獲
搭地鐵撞見明星其實唔難，不少藝人好似周潤發、郭富城、張智霖及袁詠儀等都試過搭地鐵，貪方便又快捷。
撰文、攝影、攝錄：娛樂組
|
鍾意就快D Share啦！
|
|
|
