常識題：阿強喺地下執到100蚊，交俾警察處理，請問佢係：
1.路不拾遺
2.拾遺不報一秒作答。Time's up。路不拾遺係美德，拾遺不報卻屬刑事罪。唔信可以問八両金。現年63歲嘅八両金（原名葉競生），成日都粗金鏈雪茄look現身，原來佢真人絕對唔係好似金鏈或雪茄咁粗心。日前大約傍晚6點幾，見到八両金孖住「八両仔」葉小霆（Jacky）出動，一黑一白父子look「拍拖拖」，仲浪漫到去淺水灣行沙灘。最初兩人其實係喺沙灘附近嘅商場涼冷氣，企喺落地玻璃係咁向外望，八両金就好似遊客咁拎手機影影影，唔知係影窗外靚女定係風景，八両仔就撓埋雙手，跟住老竇後面。曾被指同歌手方皓玟撞樣嘅八両仔，繼續佢至愛「港版MJ」打扮，一頭金毛紮成cute cute小辮，室內仍堅持戴黑超chok住擺甫，星味勁過老竇。八両金影咗一陣，咦，發現咗個巨大波波池———唔好諗衰嘢，係真係真係有波波嘅波波池。除咗有波仔，仲有吹氣甜筒同甜圈，兩仔爺童心未泯，輪流除鞋踩入波波池玩………又拎起吹氣甜筒互影。影完後，八両金突然揮揮手，以為佢撞到熟人，原來係軍裝警。睇真啲，見佢將一個黑色小皮包，遞俾軍裝警。軍裝打開檢查，拎咗好多好多紙皮出嚟，好似變魔術咁……好明顯，呢個係一個新包包。原來八両金執到一個冇人認領黑皮包，於是報警，兩父子即場俾口供，搞咗一輪。路不拾遺嘅八両金，涼完冷氣，就同八両仔漫步深水灣，好不浪漫。食慣粗嘢嘅八両金一行出商場門口已急不及待抽番兩口。喂，沙灘係禁煙喎！兩仔爺行咗陣，當時雖然收咗陽光，但天氣仍然翳悶，父子行到身水身汗，一去到深水灣就急不及待搵廁所放水，跟住好快就唔見咗踪影，估計係上咗的士。八両金路不拾遺《蘋果》今日打畀佢，佢就話：「係呀，嗰日我見到有啲遊客，似係日本人，佢哋咿咿哦哦講嘢，跟住走咗，漏低咗黑皮包，我執到，發現佢係『箍治』（Gucci），名牌嘛，又脹卜卜，我擔心遊客會失咗證件，又唔敢打開，所以交畀警方，希望失主搵得番。」八両金仲話其實係囝囝先發現失物，問佢點處置，父子商量後決定報警。問八両金點解去去淺水灣？佢話：「我有時間就會同囝囝入去睇吓海，靜靜哋睇吓大自然。」八両金又話專登步行去深水灣：「平時冇乜嘢時間鍛練身體，咁樣行吓，標吓汗，對身體好。我又可以一路行，一路教導囝囝做人道理。有時我會兩父子吃飯，見到乜嘢人生百態，又同佢分析討論吓。」呢啲係咪就叫男人的浪漫？
| （攝影：吳耀輝、孔志豪） | | |
| | | |
| | | |
| | | |
| |
|
鍾意就快D Share啦！
|
|
|
