恭喜，恭喜官恩娜(Ella)又做媽咪今年38歲，兩年前嫁俾混血醫生Juan-Domingo Maurellet嘅Ella，婚後火速造人，生咗囝囝Garbriel(bébé G)後，Ella一直停工，留喺屋企專心湊仔，更堅持全母乳餵哺唔修身。話咁快囝囝已經兩歲大，雖然偶有Ella嘅新聞，不過9成新聞都係關於囝囝，而喺Ella嘅IG中，幾乎所有相都係囝囝嘅成長片段！復出日子一拖再拖，到兩個月前，Ella終於重返錄音室，更喺IG貼咗喺錄音室錄歌嘅相，唔少引頸以待嘅歌迷，都喺個Po留言問Ella係咪復出。(新聞連結：http://bit.ly/2wTlYcP )不過，歌迷睇嚟又要再俾心機等吓，噚晚Ella就一家三口拍短片，喺IG宣布陀住第二胎嘅喜訊，預產期係下年1月。現時Ella肚裡BB已經4個月，人母仲鬼馬留言：「BeBe G Has something to tell you.」喺短片中 ，Ella同囝囝喺沙灘玩，用樹枝喺沙灘上寫字。身穿黑色鬆身裙嘅Ella，已覺肚凸凸。據知現身處法國嘅佢，由於日日嘔嘅關係，體重不升反跌咗幾磅，而佢就打算喺香港生B。雖然肚裡BB已經4個月，但Ella就叫醫生唔好講性別住，打算留個驚喜畀自己同老公咁話。官恩娜再陀B，唱片公司發言人回應話，之前只有老闆知道，其他同事都係噚日先知。停工湊仔嘅官恩娜早喺5月已低調復工，入錄音室錄新歌，點知第一首歌未錄完，老闆就叫停。唱片公司發言人話：「當時只有老闆知乜事，大家仲以為Ella離開咗香港，原來佢有咗，嗰時未夠3個月唔講得，所以公司影新海報佢都冇嚟到。」問Ella會否再入錄音室繼續錄歌？唱片公司方面話暫未有安排，目前Ella同老公仔喺法國旅行，之前日日嘔，依家4個月好番啲。」
|
鍾意就快D Share啦！
|
|
|