藝人衛詩雅入行多年對演戲熱誠有增無減，在幕前享受演員的工作，但卸下演員身份，她亦甘願默默擔任片場幕後工作，目的是為感受在片場的氣氛。她坦言想一圓導演夢，自編自導自演一個屬於自己的香港故事，帶出香港文化情懷。
藝人衛詩雅在今屆香港電影金像獎中以一身性感打扮現身，令人眼前一亮，其實入行多年的她，入行前曾任職珠寶業，有一份穩定的收入，但為了一個演戲夢想，毅然辭去工作入行。多年來詩雅演出過不少角色，享受做幕前的同時，她也希望一嘗做導演，更已經不時寫劇本，希望可以開拍一個有關自己年代的香港故事：「如果有咁嘅機會我一定想嘗試，可能我太享受做演員，最幸福係做演員，所以有機會（執導）會試嘅，但興趣唔會大過做演員。」
想拍香港情懷故事
問到如果自編自導自演可會考慮？詩雅即答：「咁就OK，我平時都有寫吓劇本，又或者同人傾吓劇本。（想拍咩？）拍關於香港地道事，我係一個土生土長香港人，想拍一個屬於自己年代嘅故事，拍個香港情懷嘢，以一個輕鬆手法帶出香港文化。」
客串撈幕後都滿足
若對工作充滿熱誠，就會愛上工作的全部！而詩雅正正就是這類人，除了享受演戲，更愛上在片場的工作，即使沒有戲份她仍會返回片場幫忙做幕後，在現場感受當中氣氛也覺開心，她說：「可能我太鍾意演戲，畀我喺片場做任何角色我都鍾意，應該話我好鍾意喺片場入面嘅感覺，無論係咪演緊戲都好。就算冇我嘅戲份，我都堅持要返去片場，幫手推吓軌打吓板呀，做吓副導，我好享受現場嗰個氣氛。」
拍戲迷失匿酒店唔願見人
衛詩雅拍過不少電影，亦有迷失的時候，她憶起拍畢電影《失眠》後，竟有家歸不得，想收埋自己。
她說：「拍完戲之後我放咗兩個星期假，去咗酒店住收埋自己，因為嗰陣返唔到屋企，如果返去，個狀況屋企人會擔心，嗰段時間好想自己一個人，等自己輕鬆吓先，所以選擇匿喺房，每日睇戲睇電視。（冇出過街？）每日就係出去食早餐，之後叫Room Service囉！」
乜都學讀中醫自我調理
衛詩雅入行前從事珠寶工作，早已擁有珠寶鑑證師牌照，早年更曾做才女推出教人揀鑽石的著作，近年她邊演邊學，開始學寫劇本望執導演筒外，原來連中醫都學埋！
做演員除了要有演技，亦要有良好體魄，詩雅坦言為此曾學習中醫調理身體：「我識睇自己面色，一唔好咁就要飲紅棗水，都有買書學過，亦有報過短期嘅班，因為我乜都有興趣、乜都想知道。」她自認乜都想學，希望能成為朋友的百科全書，但笑言現階段還未夠「斤両」。
場地：鉄人旨花
|
鍾意就快D Share啦！
|
|
|