憑參加《全美一叮》為人認識嘅九歲小妹妹譚芷昀(Celine)，又再出發到美國繼續比賽， 今朝10點20分左右，Celine同爸爸譚順生，仲有媽咪同妹妹Dion一齊去到機場準備出發到洛杉磯，揸住個扭計骰不停玩嘅Celine同爸爸一齊接受訪問，話全家今次一齊過去支持Celine，咁今次揀咩歌出賽？爸爸就話：「首歌仲未講得住，到時Live Show大家就會聽到，首歌係美國嗰邊揀，都練咗兩個星期。」咁Celine有冇信心？佢就話：「有信心。」爸爸喺隔離話好Proud of佢，自己反而壓力仲大過Celine。講到今次比賽仲有一名十歲嘅小朋友，Celine有冇見過對方？佢話冇但自己都有信心。爸爸就繼續話：「其實我哋都當佢贏咗㗎啦，去到呢個地步已經係為華人爭光。」 今次再去美國比賽，對開學有冇影響？問到Celine幾時要返學？佢話：「聽日。」爸爸就喺隔離話：「原本係聽日，但係依家要參賽所以要請假，不過學校校長好支持，仲發Email同我哋講話全校都支持。」咁擔唔擔心比賽完返學進度跟唔上？爸爸就繼續話：「唔怕，我哋平時都安排咗好多唔同學習嘅嘢畀佢哋，除咗唱歌之外，亦都有一啲時間淨係畀佢哋做功課，或者睇歌詞、明白歌詞嘅意思。」講到之前有唔少人批評Celine唱歌冇感情，Eric Kwok甚至講話佢唱得似機械人，Celine爸爸繼續代答：「其實每次都希望可以表現多啲唔同嘅嘢，節目嗰邊亦希望表演特別啲，始終係一個國際性嘅比賽，但Celine最擅長始終係唱歌，況且佢只得九歲，所以盡量令佢開心就得㗎喇。」爸爸講咗咁耐，咁Celine你自己覺得緊唔緊張呀？佢一邊玩住扭計骰一邊講：「唔緊張。」咁參賽開唔開心？佢話：「開心。」爸爸又話今次去美國會逗留一段時間，到埗後隔幾日先會正式比賽，中間會有時間綵排，而且佢哋嘅服裝全部都係大會提供。咁今次會唔會著高踭鞋呀？爸爸就笑住問Celine：「你呢，你想唔想著高踭鞋呀？」但Celine繼續掛住玩扭計骰。訪問後一家四口向在場記者邊揮手邊步入閘口，包括坐喺BB車上嘅細女Dion，臨走前爸爸仲好熱情咁向大家揮手拜拜。喺呢個時候 ，可能因為有人群聚集引起好奇心，企喺記者同譚順生中間一名機場職員腰間嘅對講機突然間響起一段對話：「邊個入嚟？」一把女聲就答:「全美一叮。」好奇嘅職員再問「係咪借個女上位嗰個？」而同時間譚順生就行咗入閘，唔知佢聽唔聽到呢？
| （攝影：沈健程） | | |
| | |
|
鍾意就快D Share啦！
|
|
|