無綫小生變港姐殺手 陳展鵬盡顯柔情：合得嚟開心
陳展鵬與袁偉豪兩位無綫小生齊齊變身「港姐殺手」，陳展鵬接受專訪提到女友單文柔，甜在心並為「護花」費盡心思，又以「幾好」形容目前的感情生活，看來跟單文柔的感情已漸趨穩定。另一邊廂，袁偉豪亦公開認愛，承認與張寶兒拍拖，還指自己未過試用期！陳展鵬、袁偉豪齊擁港姐女友，亦即意味無綫又少兩個男神筍盤！
陳展鵬拍無綫劇《城寨英雄》後，被觀眾「認定」跟胡定欣是一對，但緣分往往很奇妙，途中竟殺出曾選港姐的單文柔，令大眾反應唔切兼跌到一地眼鏡碎！起初粉絲對展鵬這位「新歡」未能接受，但正所謂你有你鬧，我有我愛，早前趁無綫活動更雙雙接受訪問，以行動證明戀情並未動搖！
「要保障對方」
日前陳展鵬接受本報專訪，提起女友單文柔，他亦冇避忌，坦言從沒刻意低調感情事，只是不想在不適當時候提起：「有時未必咁合適，無喇喇半版（娛樂新聞）係佢（單文柔），好奇怪，可能觀眾鍾意睇。有時覺得男人投入工作，唔好擺咁多兒女私情，公司活動冇咩所謂，各有各開心！」問到何時公開認愛？陳展鵬「護花」有自己一套想法：「唔在乎認唔認，要保障對方，認拍拖、結婚唔難，係時間性啱唔啱，開心當然好開心，唔開心亦會受到好多壓力，呢啲就算分開咗都仲要承受，我係成熟男人，總之合得嚟開心就自然係，時間證明一切。」現在感情生活如何？他笑着說：「幾好，冇乜特別」單文柔是否結婚對象？他笑謂：「唔好咁心急，急過我，等大家相處了解吓先！」
劇集《同盟》正在熱播，陳展鵬與胡定欣這對螢幕情侶經常在劇中打情罵俏，因此緋聞又被翻炒，展鵬也感無奈：「冇法，惟有順住去，其實好多演員喺劇度付出好多，但每次報紙都係出現定欣、山聰、我呢啲，又會出咗啲冇參與套劇嘅演員新聞，我諗監製都未必鍾意。（接受每次被問感情事？）冇所謂，只要唔好令大家尷尬，私下問乜都得，你問乜都會答，但要睇場合，希望大家有個平衡。」
同定欣默契滿分
談到前緋聞女友胡定欣，展鵬不諱言雙方默契已到達毋須多講的地步，憑一個眼神便知道對方所想，更謂：「我哋可以喺特定空間發揮到好多嘢，咁多個拍檔中，暫時只有定欣可以做到咁樣，至少呢個圈入面，冇女仔可以有佢咁嘅體能。劇入面佢打得好甘，記得拍之前一齊跟教練操體能，定欣玩嘅重量係同男仔差唔多，所以畀佢打一巴都幾係嘢！」
單文柔被跟感憂慮
單文柔被問到陳展鵬對戀情不再避忌，她說：「我同佢相處係正面同開心，一向對感情低調，亦有自己想法同自己一套，唔想太高調有壓力。」提到陳展鵬指她因怕被追訪以致出現思覺失調，單文柔笑指：「佢講笑啫，思覺失調有啲誇張，係有時畀人跟，自己又唔醒目，畀人跟咗好耐都唔知，最驚啲醜怪、唔靚嘅相，又擔心影完唔知寫乜嘢，雖然我過嘅係普通人生活，但都有啲擔心。」
文：影視組
攝：黎志輝
|
鍾意就快D Share啦！
|
|
|