男人三十而立，別人眼中的二世祖鄧兆尊，小學三年級已立。因為祥哥新馬師曾早在鄧兆尊小三時，晚晚捉住佢講人生道理，日日如是，一直維持到中學。鄧兆尊形容，自己十幾歲嗰陣已有豐富的人生歷練，當然仲有好多娛圈秘聞。依家鄧兆尊就係用番老竇教佢嘅嗰一套，用來照顧家人。因為一個錢字，令鄧兆尊今日再成周刊封面人物。但講得更多不是遺產稅上訴同楚留香易手，而是鄧兆尊口中的愛生事家庭。鄧兆尊稱，四兄妹有一個阿公戶口，出售老父物業或地皮的收入，都入晒呢個阿公嘅戶口，啲錢四兄妹一齊用，無論買車買表定買豪宅，都計得清清楚楚。啲錢點用，大家一齊商量，但即使如此，都買咗好多古怪嘅……例如，買Rolex嘅Daytona，細佬兆榮想買，但為咗要公平，兆榮就買鋼帶款俾自己，買個皮帶款俾兆尊。但兆尊接受周刊訪問時就話，其實祥嫂之前已經買咗隻八十萬嘅表俾佢，佢都好少戴。兆榮愛名表，當然也愛名車。都係用阿公錢，亦要力求公平。咁點好呢？兆尊舉例，兆榮同佢講，話你(即兆尊)鍾意白色喎，咦，你(都係兆尊)又鍾意林寶喎，咁啦，其實我已經買咗喇……當然係用阿公錢，架車由兆榮「揸住先」。兆尊受訪時笑言，連佢自己都唔知原來自己鍾意白色林寶嘅。Keep車匙呢啲咁辛苦嘅工作，兆榮都不讓兆尊辛勞。兆尊話，每次要用車，都會問大家有邊架車依家係無人揸嘅，就俾佢揸啦。所以外間以為兆尊咁勁咁多車，其實係兄弟姊妹唔揸就輪到佢揸咁話啦。
|
鍾意就快D Share啦！
|
|
|