於觀眾及粉絲眼中，打從無綫劇集《城寨英雄》開始，早已認定陳展鵬與胡定欣為一對，但往往天意弄人，途中卻殺出個曾參選港姐的單文柔，令大家嘩然之餘，更跌到一地眼鏡碎，起初粉絲們對展鵬這位新歡的確未能接受，但正所謂你有你鬧，我有我愛，早前趁公司活動更雙雙接受訪問，以行動證明這段戀情並未動搖。
唔想令大家尷尬
不過隨住近日展鵬與定欣新劇《同盟》即將播出，「定鵬」緋聞又再被翻抄，展鵬對此也大感無奈，他謂:「冇法，惟有順住去，其實好多演員喺劇度付出好多，但每次報紙都係出現定欣、山聰、我呢啲，又會出咗啲唔係關於參與呢套劇嘅演員新聞，我諗監製都未必鍾意！（接受咗每次被問感情事？）冇所謂，只要唔好令大家尷尬，私下問乜都得，你問乜都會答，我又唔會避開問題唔答，但要睇場合，係好難控制到，可能咁先有Gimmick，希望大家有個平衡。」
「唔在乎認唔認，要保障對方」
展鵬坦言從來沒有專登低調感情事，認為媒體可能會覺得他是逃避，他謂:「有時未必咁合適，冇啦啦半版（指報紙）係佢（單文柔），好奇怪，可能觀眾鍾意睇，有時覺得男人投入工作，唔好擺咁多兒女私情，公司活動冇咩所謂，各有各開心。（咁認唔認拍拖？）唔在乎認唔認，要保障對方，認拍拖、結婚唔難，係時間性啱唔啱，開心當然好開心，唔開心亦會受好多壓力，分開仲要承受，我係成熟男人，總之合得嚟開心就自然係，時間證明一切！（依家感情生活ok？）幾好，冇乜特別」
同定欣不嬲最有默契
談到前緋聞女友定欣，展鵬不諱言雙方默契度已達到沒有需多講地步，只要一個眼神便獲悉對方所想，更謂：「大家已經有咗默契，有種互相信任嘅基礎，令我哋可以喺特定空間發揮到好多嘢，喺咁多個拍檔之中，暫時只有定欣可以做到咁樣，至少呢個圈入面，冇女仔可以有佢咁嘅體能先劇入面佢打得好甘，搞到佢都驚驚地會變咗做打女，記得拍之前有一齊跟教練操體能，定欣玩嘅重量係同男仔差唔多，所以畀佢打一巴都幾係嘢！當然，成套劇都會有親熱戲，動作得嚟都浪漫嘅。（呢套劇有喜劇成分，覺得自己搞笑叻唔叻？）平時係少拍呢啲戲，所以今次拍之前都排，間唔中可以爆肚，同埋加咗好多動作落去，令成件事好笑好多，我同定欣劇入面嘅對手全都係咁，好好笑。」
容易受傷的男人
雖然定欣不乏打戲，但展鵬自言也毫不遜色，劇中要應付連場巴西柔術及綜合格鬥（MMA），由於後者從未接觸過，所以開拍前特別上堂接受訓練，沒料過程間差點弄傷頸，認真驚險。對於近年開工頻頻受傷，儼如容易受傷的男人，展鵬表示理應因缺乏休息所至，他謂:「巴西柔術係幾難，體力要好夠，我學咗幾招，原來每招都有名堂，但拍嗰時都有用替身，因為體能真係唔夠，監製知我好唔夠瞓，套劇試過最長開工40個鐘冇瞓，每日開廿個鐘係基本，不過最甘係拍《叛逃》，成50個鐘冇瞓過。」
「有個shot開8槍，8槍都眨晒眼」
對於劇中最深印象的一幕，展鵬首推於台灣沙灘拍攝的衝浪戲份，透露當時天氣僅得5、6度，海浪亦起伏不定，已放下該玩意十多年的他，卻要於沒有救生員情況下落水，故顯得戰戰競競：「一捲出去海就冇，但都要頂硬上，好似最終都有兩個take上到板，導演仲喺個shot度偷到好多嚟用，好開心。」至於揸槍部分，展鵬笑指這令他苦惱了一陣子，他謂:「唔眨眼真係難，都唔明定欣同鮑姐（鮑起靜）點解可以開好多槍都唔眨眼，我有個shot開8槍，監製話我好嘢，8槍都眨晒眼，所以叫我下次都係戴番副超，後來到中尾段，我終於衝破到障礙，原來唔係驚槍聲，係驚開槍之後嘅火，團火喺面前自然會驚，之後我睇番好多戲，原來好多男演員會眨眼，就連周潤發都有，只不過依家大家要求高，想個個都似這個殺手不太冷咁，開槍點都要型用靚啫！」
|
鍾意就快D Share啦！
|
|
|