9月30日是歌手江若琳（Elanne）30歲生日，日前其「生煎包王」男友蕭潤邦（Oscar）早已帶她到泰國展開六日慶生之旅，此行程由Oscar一手包辦，雖然估計只約花六數字，且他又沒有帶女友到當地掃名牌，但兩人在有沙灘、泳池的酒店享受二人世界，日日香檳當水飲，難怪Elanne全程冧爆！
瘋狂喪食
Oscar接受東網長途電話訪問時，形容此行目標是餵飽女友：「佢（Elanne）為咗之前個演唱會乜都唔食得，我都唔食，我忍得好辛苦，其實一完咗騷，我都想立即帶佢走㗎啦。」問他如何餵飽女友？他謂主要是兩個人着住拖鞋周圍食：「我哋有一餐，兩人食咗四碗麵、一碗湯同一碟飯，好勁，另一餐食咗三碟豬腳飯，連啲泰國人眼神好奇怪，點解我哋可以食咁多嘢呢。」
問Oscar除咗假期外，可有再送生日禮物？他說：「都係送女人嘅首飾囉，可以戴喺身上，唔通買個西瓜畀佢咩？」問兩人如此恩愛，可會兩個人去三個人返？他直認：「係四個人返至啱，佢本來100磅，依家變200磅，我就食到變咗300磅，四個人重量，飛機未必載我哋，可能超重。」
自稱冇乜大志
而壽星女Elanne被問到有何生日願望？她冧爆說：「好開心，覺得唔係自己一個人，有一個咁搞笑嘅人喺身邊，我經歷過咁多嘢，都冇乜大志，冇話要咩目標、做啲乜，冇咩生日願望，最緊要開心同健康。」而愛搭訕的的Oscar則插嘴說：「世界和平呀」，激到她發嬌嗔說：「妖你呀。」又在公開耍花槍。
問Elanne對Oscar前晚為她慶生的表現如何？她讚：「佢唔止一日嘅表現，我同佢咁耐，佢表現一直都好滿分。」如男友向她求婚可會答應？她笑言：「睇吓佢做咩呢。」但不諱言男友在朋友圈中的評價很高，她亦望男友是陪她行到最後的人，直認自己對婚姻係有憧憬，似乎Elanne已準備答應Oscar的求婚。
|
鍾意就快D Share啦！
|
|
|