猷亨：朋友撐我，唔係講政治
四太選戰 麥明詩站台唱《我願意》
賭王四太梁安琪與兒子何猷亨今年母子檔參加澳門立法會選舉，前晚在澳門造勢，十優港姐麥明詩忽然「路過」撐場，皆因她與猷亨是多年的好友。獲網友封「民主女神」的麥明詩在台上唱《我願意》時更表示：「我願意支持四太。」義氣撐好友，卻惹來網民有非議，猷亨表示朋友只是來撐場：「唔係講政治。」
麥明詩前晚忽然現身澳門為四太與猷亨「站台」，她手持太陽花笑言：「我願意支持四太。」
賭王四太梁安琪於05年出任澳門立法會直選議員，已連任3屆，今年她組織「澳門發展新連盟」再選，兒子何猷亨亦是候選人名單，母子連日在社區舉辦活動，為星期日（17日）投票日造勢拉票。兩母子及其他候選人前晚在澳門西灣湖廣場辦晚會，有澳門讀者爆料，指猷亨好友林作的前度女友麥明詩忽然「路過」現身，更被邀請上台，與四太、猷亨及超欣影合照，四太搞笑地表示：「嗰時佢哋16、7歲，見到阿詩，覺得呢個女仔幾好。點知阿詩之後拍咗拖（指林作），就同阿亨講話佢走寶。」
四太搭實麥明詩，大讚她是好女仔，笑言猷亨走寶。讀者提供圖片
猷亨與麥明詩自十多歲便認識。
麥明詩前年出席保良局活動，為四太及猷亨撐場。資料圖片
惹網友非議
從片段所見，猷亨在台上搞氣氛，他指着麥明詩說：「我老死（林作）愛我多過愛佢，咁多年嚟，我哋感情十幾年，今日咁啱路過，支持吓我哋好唔好。」手執太陽花的麥明詩更獻唱《我願意》，台下有人起哄，猷亨即執生謂：「係我願意投你一票。」而麥明詩就笑笑口：「我願意支持四太，你阿媽。」
其實麥明詩不但是猷亨在英國讀書時好友，更是四太孻女超欣的補習老師，所以她前來為四太「站台」都合情理，不過一向對政治議題敢言的麥明詩，被網友封「民主女神」，而四太所率領的「澳門發展新連盟」屬建制派政治團體，麥明詩站台惹來網民非議，指她不了解澳門立法會選舉，當中有網民留言「諗唔到同建制咁friend」、「仲話係黃絲港姐，為咗交情就撐個建制派」等。
麥明詩昨回覆傳媒時否認撐建制派，表示純粹支持好友：「我同猷亨認識咗好多年，人生第一次見佢咁努力同投入，好想鼓勵佢，其實我都唔知背後嘅政治立場。」
猷亨昨回覆本報指與麥明詩自十多歲時已認識：「我喺澳門有選舉活動，成班朋友嚟澳門玩，佢知我有活動就嚟探我班。大家係一場朋友，唔係講政治。」
何猷亨與林作（中）為英國中學同學，二人相當老死。資料圖片
麥明詩一向為民主敢言，但被網友指她為交情支持建制派。資料圖片
幫超欣補習
四太則否認麥明詩為她「站台」：「佢哋成班朋友嚟澳門玩，嚟捧阿亨場，我見到佢，梗係要捉佢上台。呢個小女孩，係我個仔嘅朋友仔，我識佢嗰時都未做香港小姐，佢讀緊劍橋，幫欣欣（超欣）補習，已好欣賞佢，佢講嘢好叻，欣欣考到間好大學，都好多謝佢，佢係一個好榜樣。」
採訪：嵐山、唐如
|
鍾意就快D Share啦！
|
|
|