打得火熱 充電見老友
袁偉豪張寶兒蜜遊沖繩
【爆相爆片】現年36歲的「港姐殺手」袁偉豪跟舊愛岑杏賢分手不足一年，已經火速覓得第二春治情傷，上月公開認戀比他細11年的上屆港姐張寶兒，「袁寶戀」拍拖僅數月愛火高燒，25歲的張寶兒秘陪男友去旅行，兩人戀戰沖繩被捕獲，當時張寶兒掛着撳手機冷落男男，袁偉豪發現被影相即扯火。
袁偉豪與張寶兒大前日被撞破在沖繩旅行，張寶兒全程玩手機冷落男友。讀者提供圖片
香港先生出身的袁偉豪，似乎對港姐情有獨鍾，前度岑杏賢是12年的最上鏡小姐，現任女友張寶兒（Bowie）是16年的友誼小姐。岑杏賢於去年11月在網上自爆分手，並指因感情失去信任和安全感，疑似花心被飛的袁偉豪，其後出席活動自責不懂珍惜。事隔9個月，袁偉豪上月被爆暗撻張寶兒，兩人去非洲拍節目時擦出愛火花，他火速認戀細自己11年的新歡。兩人拍拖短短幾個月，感情一日千里，原來袁偉豪跟女友去了旅行戀戰沖繩，被讀者李小姐透過本報「爆相爆片」分享。
張寶兒與袁偉豪及友人在美國村附近閒逛。讀者提供圖片
袁偉豪與張寶兒因拍節目而撻着，上月公開認愛。
「默默跟佢身後」
李小姐接受電話訪問時表示，於大前日傍晚6時許，在日本沖繩的美國村見到袁偉豪跟女友張寶兒行街，同行還有一位男友人，她說：「佢哋三個人企咗喺度一陣唔走，之後見佢哋過對面馬路，會合一個女仔朋友，過程中袁偉豪有同男仔傾偈，但身邊女友就密密撳電話。」問到袁偉豪跟女友有否親密表現？李小姐表示：「佢哋冇拖手，女友只係默默跟佢身後。我本想影正面相，但佢望到我，好似想叫住我咁，我就走咗啦。」
上周六，袁偉豪仍身在香港出席活動，相信跟女友是於大前日才飛沖繩，抵埗後約朋友到美國村行街即被讀者捕獲，他在社交網亦沒透露行蹤，似乎想低調保護戀情。對於被讀者踢爆與女友去沖繩旅行，袁偉豪回覆傳媒表示：「其實我嚟呢度係自己休息嘅，因為做嘢忙咗9個月，見有少少空檔，所以就過嚟呢邊搵朋友，我係同Bowie一齊過嚟呢度，其餘我就唔講嘞。」
袁偉豪更不吐不快：「我唔係好喜歡香港人嚟到呢度見到我哋即刻用手機影，唔好同我講食得鹹魚抵得渴，我絕對唔認同，如果想留紀念影相我絕對冇問題，但我唔鍾意𠵱家啲人偷影，好冇禮貌，完全侵犯我私隱，呢個矛盾得嚟好難妥協，唔好因為我係公眾人物就可以俾人咁影，掉轉我影你擘大口食麵，你會點呢？將心比己。」
07年參選港男奪冠的袁偉豪，有胸肌有腹肌身形甚弗。資料圖片
去年參加港姐的張寶兒，三甲不入，慬獲友誼小姐獎項。資料圖片
拍節目擦出愛火
今年5月，袁偉豪和張寶兒到非洲拍節目，日對夜對擦出愛火花，他受訪時自爆當時用短訊試愛，獲張寶兒回覆：「不知如何去做你背後的女人」，知道大家對彼此都有感覺，本來想開始新戀情的他，返港後想多兩想又遲疑，向張寶兒表示做回朋友，幸對方大方接受兼體諒，才令他明白不能錯過這個女仔，兩人終在一起，更感激細11年的女友沒嫌自己是uncle。張寶兒大讚男友有童心，大家可以溝通，舊愛岑杏賢亦送祝福，袁偉豪亦祝舊愛找到一個比他更好的男人。
採訪：皓騫
|
鍾意就快D Share啦！
|
|
|
