67歲嘅薛家燕呢排晚晚出現喺公仔箱，呢位《燦爛的外母》喺現實生活現實係位「燦爛的奶奶」，因為佢二仔石耀庭今年4月向拍拖兩年女友Zoe求婚成功，一對準新 ...
67歲嘅薛家燕呢排晚晚出現喺公仔箱，呢位《燦爛的外母》喺現實生活現實係位「燦爛的奶奶」，因為佢二仔石耀庭今年4月向拍拖兩年女友Zoe求婚成功，一對準新人打算出年拉埋天窗。
家燕姐早年被前夫石保慶拋棄，含莘茹苦將三名子女養大，單親媽媽唔易做，佢96年正式辦妥離婚，即復出拍劇接騷養家，先後為三名子女供書教學，30歲二仔石耀庭今年4月向女友Zoe求婚成功，當日石耀庭總動員媽咪、家姐石祐珊同細妹石耀珠幫手籌備求婚騷，令Zoe大為感動，家燕姐事後大讚準新抱100分。（新聞連結： http://bit.ly/2p8WW9P ）
家燕姐第一次娶新抱，一早決定為囝囝擺一百圍酒席，同埋送家傳之寶畀新抱Zoe。呢位「燦爛的奶奶」對囝囝婚事，比兩位當事人仲興奮，每次提起都笑到四萬咁口，一對準新人近日去咗英國影婚紗相。據知婚期已擇日喺明年6月中，家燕姐近日去咗洲際酒店訂場，主要宴請男家親友同女家至親，單係婚宴開支，埋單起碼要7位數字。
家燕姐出年係入行60周年，今年中曾宣佈入紙紅館搞紀念騷，可惜年底檔期未批，製作單位有意延遲到明年7月，撞到正佢娶新抱大日子，家燕姐定好囝囝婚期後，佢馬上將整個6月鎖起唔接job，停工成個月籌備囝囝婚事。家燕姐今日回覆傳媒時話：「婚期同場地都定咗，我有三個仔女，呢次係囝囝搶閘結婚，我第一次做奶奶喎，梗係好多嘢要揸主意。最緊張係賓客名單，我60年代入行做到o依家，識落幾世代朋友，最擔心請漏賓客，萬一疏忽請漏，希望大家唔好介意。」好友陳寶珠有過做奶奶經驗，佢都同家燕姐分享，家燕姐話：「寶珠畀咗好多貼士我，教我賓客席位要點樣安排，佢過咗我幾招，叫我隨時有問題可以再問佢。」
有周刊報道指家燕姐自96年復出，工作做到冇停手，加上佢投資有道，狂買物業。有指家燕姐至今手頭擁有約7個物業，總巿值逾一億，佢呢次娶新抱，仲大手筆送一間2,000萬西半山豪宅畀囝囝做愛巢，其實唔止有豪宅，原來仲一個面積約2,000呎觀塘工廈單位，價值成千萬，家燕姐有見囝囝搞製作，業務近年都拓展中，需要一個大啲嘅寫字樓，家燕姐一於出錢支持：「我係冇偏心，三個仔女，人人都有一間寫字樓。」問到家燕姐送乜嘢家傳之寶畀新抱Zoe？佢話：「一啲首飾啦。」咁係翡翠定鑽石？家燕姐話：「乜都有啲，前幾日揀好晒。」
