林保怡被發現在醫院外講電話，眼角則貼上紗布。近日他與劉美君籌備拍攝《偷窺》MV而忙不停。
藝人林保怡近期工作忙碌，早前有消息話佢會為歌手劉美君紅館演唱會擔任嘉賓，仲話會為二人經典合唱歌《偷窺》重拍MV。
不過，有網友日前就發現林保怡現身沙田區一間醫院，當時佢喺醫院門外講電話，跟住就向急症室方向行咗入去。當時林保怡眼角貼咗紗布，原來佢左邊眼角受咗傷。據悉，林保怡為咗拍《偷窺》去咗試衫，一個唔小心喺現場仆親，仲撞傷埋眼角，當佢發現眼角留血嗰陣，過程發生得好快，真係隨時撞盲眼，於是眾人決定他入醫院接受治療。
及後，東網聯絡上林保怡，佢話：「因為要為個MV試禮服，導演好好，準備咗大、中、細碼畀我試。我試套中碼時，導演問我中碼係咪真係啱身，我就百厭咁郁身郁勢好似做運動咁郁，點知就唔小心仆咗落地。好在係木地板，如果係石屎地後果可能會更嚴重。」林保怡話當佢起番身時，導演個太太就驚叫咗出嚟，原來佢左邊眼角已經流緊血，林保怡話：「咁我就去咗沙田威爾斯醫院，點知人多我就改咗去仁安。」
戒口唔想影響傷口
醫生叫林保怡縫針，但佢喺《妙手仁心》入面飾演過醫生，對於醫療程序都有啲認識，所以就同醫生講可唔可以縫針但唔剃眉毛。林保怡解釋：「因為擔心會影響到12號拍MV。依家MV喺12號夜晚拍，我上午可以去拆線，希望冇影響。」問到林保怡會否擔心破相，佢就話：「男仔都唔擔心嘅，只係希望個傷口埋口好啲，所以依家要戒口。」最後縫咗九針！
來源 source: http://hk.on.cc
|
鍾意就快D Share啦！
|
|
|