今年港姐三甲，你未必認到邊個係亞軍、季軍，但肯肯定冠軍雷莊𠒇(Juliette)個樣，你我他一定印象深刻。
自從月初(3日)港姐選完後，冠軍Juliette幾乎日日喺網絡上出現，身影同五官無處不在，雖然留言9成係惡評，不過網民依然樂此不疲將佢樣貌、言論無限放大，講曝光同話題性，應該係近呢幾年最有話題性嘅港姐人馬。
深入民心嘅後果，就係無論Juliette有化妝抑或素顏求其紮個髻出街，街坊、途人都輕易認出。繼日前佢冇乜化妝，喺尖沙嘴厚福街搵嘢食後。(新聞連結：http://bit.ly/2gJB7aa )周四(14日)晚上約7點，又有讀者鄭小姐透過《蘋果》 「爆相爆片」，見到雷莊兜着住橙紅色one-piece裙，化濃妝喺港鐵車廂出現。鄭小姐表示：「嗰陣見佢喺將軍澳綫過海，可能手上又拎住月餅同啲紙袋好狼狽嘅關係，所以佢一見到位，就走埋去坐。呢日佢就set咗頭同化咗妝，所以好易認出。當時佢隔籬坐咗一位媽咪同小朋友，見個媽咪認得佢，就同佢say hi，之後佢哋就全程用英文傾偈，見佢仲有撩個小朋友講嘢，又一齊selfie。」
鄭小姐仲話隠約聽到Juliette同嗰位媽咪講，自己原本想搭的士去中環，但因為驚塞車，所以最後選擇搭港鐵。
據鄭小姐所提供嘅相片，同第二日Juliette喺IG貼同關之琳嘅合照，條裙同髮型都一樣，估計當晚Juliette急住搭港鐵去中環，就係要趕去參加之之嘅生日飯局。
|
鍾意就快D Share啦！
|
|
|