司馬燕死後數月被揭搞婚外情
孫君子辣火頭掀罵戰
娛樂要聞
司馬燕於2012年確診患上胃癌，喺佢切除胃部手術及康復之後，Togi遵守承諾帶老婆返荷蘭再舉行一次婚禮，加上佢全程陪太太抗癌，不離不棄咁，當時外界盛讚Togi係好男人、好老公；到前年1月司馬燕病逝，有傳Togi因未能接受太太死訊而拒絕同外界接觸，朋友打電話俾佢都唔聽，令人惻然。
戲劇性事件發生於同年，即2015年11月，Togi被爆與大陸女子孫君子（Summer Sun）有5年婚外情，Togi發聲明否認，其間Summer四圍「辣」火頭，其中更同周美鳳有一段罵戰。
話說當時網上流出Togi與Summer嘅啜啜相，及後更揭出兩人早已有染，即Togi背妻搞婚外情，Summer更大爆原來Togi曾承諾待司馬燕過身後，就會娶佢入門，但承諾冇兌現，Summer當然發爛，佢先係對Togi身邊啲異性勁有敵意，其中一個就係司馬燕生前摯友周美鳳。
由於周美鳳喺司馬燕身故後，有一次曾約過Togi等人一齊行山，Summer直指周美鳳同自己爭仔，更先後喺唔同嘅社交網站發動攻擊，甚至有傳Summer以死要脅，喺Togi家企圖跳樓自殺。
及後周美鳳向傳媒發表聲明，列出Summer滋擾持續半年時序，並表示對一切誹謗保留法律追究權利，及要求Summer公開道歉。
雖然Togi後來有認過曾同Summer拍拖，維持只係幾個月，但就誓神劈願話自己唔會娶對方，又斥對方係個危險人物，又指事件中所有人都是受害者，只有輸家沒有贏家，令事件丟淡。直至上年初，Togi被蘋果發現戀上Ms. Beth Chim，事件才叫告一段落。
來源 source: http://hkm.appledaily.com
|
鍾意就快D Share啦！
|
|
|