掃呢頁CODE去手機

2017年9月25日 星期一

【獨家】最後一部大台劇 蔡少芬唔介意執萬綺雯二攤 __,大台,萬綺雯,蔡少芬,TVB,

近年北上搵「人仔」嘅蔡少芬(Ada),繼4年前《金枝慾孽貳》後,最近因為老友王祖藍嘅關係,決定回巢大台拍攝《老表,畢業喇!》,劇集拍完,Ada終於功成 ...


近年北上搵「人仔」嘅蔡少芬(Ada),繼4年前《金枝慾孽貳》後,最近因為老友王祖藍嘅關係,決定回巢大台拍攝《老表,畢業喇!》,劇集拍完,Ada終於功成身退,正式結束賓主關係,Ada話:「呢部係我喺TVB最舒服嘅一部劇集,之前拍嘅都好辛苦,拍到真係會喊,所以呢部真係甜品,喺TVB最後一部,咁仲唔圓滿?甜品都食埋!好圓滿嘞!好似一個bonus畀我,你問將來有冇機會?只要我仲未息影,TVB又有角色想搵我,睇吓有冇機會合作。」

大家再次喺電視銀幕見到Ada,佢話:「今次因為王祖藍囉,佢係我好朋友又係教會嘅兄妹,佢好鍚我,《老表》系列又幾好玩,我《楝篤神探》後都冇拍過笑片,所以試吓。」有指今次Ada執萬綺雯二攤,加上估計損失內地千萬身價,Ada都完全唔介意,佢話:「唔能夠比待遇同工資都不能夠比,但係我又覺得每樣嘢都有你想得到嘅嘢,當年我覺得同TVB好有感情,佢哋畀到我想要嘅嘢我,對我好好,其實已經夠,我又好想拍啲廣東話嘅戲,想聽吓現場收音,喺內地,我啲普通話又『好』,所以一定搵人配音,好難聽到自己原音。你話我執二攤?我完全唔介意有乜所謂啫?做呢行都明,就算排第7個,最緊要睇自己想唔想做,有乜所謂?我就唔信一味諗你一個。」

講番今次喺劇入面同郭晉安合作,做對歡喜冤家,Ada話:「拍得好開心,最有印象係同張文慈拍一場飲醉酒戲,佢帶咗支清酒,話自己好需要有嗰種感覺,我同佢講我都好需要,叫佢畀啲我,跟住兩個一齊飲,嗰場戲都真係有啲high,好投入,好似醉咗咁,安仔仲問我哋做乜。」而曾經喺08年憑《天地豪情》攞過視后,問Ada會唔會再想再嚐攞視后滋味?佢話:「我已經係最年青視后其實有係開心嘅,係一個肯定,不過咁多年前已經肯定咗,只要觀眾覺得好睇同鍾意我,已經係畀我好大嘅激勵。」

向來Ada畀人感覺都係同老公好恩愛又顧家,問到佢會唔會有淡出打算?佢就話:「我覺得做演員要知道自己位置喺邊,如果生咗仔或者去到某個年紀,妳唔接納做人阿媽呢啲角色,局限性就會大咗,如果只要知道自己位置,每個角色都有發揮嘅機會,我最鍾意羅蘭姐,做到今日都有得做,有時未必錢同地位問題,最緊要對演戲嘅熱誠仲喺度,如果有嘅話,你幾多歲都需要有呢啲演員喺度,好似鮑姐咁。」

08年Ada同張晉結婚,先後誕楚兒同信兒兩女,問到佢心裏面,家人、囡囡同工作嘅地位會點樣排列?Ada話:「第一緊係我嘅天父爸爸,跟住就係我嘅老公,之後先係我啲女,我成日提我老公,佢哋終有一日係會走㗎,要嫁人、有朋友,會嫌我哋煩㗎,所以我哋要記住最後要對住大家,一定要保持新鮮,女係好緊要,但都要學識放手,工作只要平衡到就得。」至於點樣保鮮?Ada話:「最緊要溝通,唔溝點通啫?有乜啫講出嚟,佢會聽,明白我,咁就有滋潤。」講番同張晉結婚,一直被外間指女尊男卑,Ada就搞笑咁話:「聽到呢啲說話冇話會舒服嘅,o依家證明你哋冇眼光囉,最有眼光嗰個咪就係我囉,有時有啲苦係好事嚟,令到我哋彼此嘅根基更加堅壯,所以我哋會更加識得欣賞大家。」

而張晉經常都暗示要Ada唔好做,照顧屋企,但卻知道太太心意,因為Ada好鍾意工作,同時對囡囡照顧無微不至,Ada話:「由細到大培養同佢哋關係,自己都好開心。我係苦媽,邊個家長唔希望望子成龍?希望小朋友好出色?我嘅出色感唔係因為佢哋嘅分數,或者有幾突出,反而我注重佢哋嘅道德同價值觀,因為我發覺呢個世界道德好敗壞,所以我希望從細呢個方扎根。」

採訪:羅慧敏

攝影:林德雄

攝錄:馮嘉銘

髮型:BarryTran of Hair Corner

服裝:KRIZIA

場地:Porterhouse



《老表,畢業喇!》係蔡少芬喺大台最後一套劇

今次喺劇入面同郭晉安合作,做對歡喜冤家

同張文慈一齊飲完酒先拍戲





鍾意就快D Share啦!