情陷夜中環
舊人
行運行到落腳趾尾嘅時候，你會幾乎想求個天，喂，天呀，唔好再俾我咁好運啦，我會俾你寵壞㗎。搭飛機，連續三次 upgrade頭等已經係基本嘢。去到台灣，最鍾意鍊住人哋啷啷傾條件嘅某位客人都突然好似立地成佛一樣，講番句人話：「 Marcus，啲 terms你揸主意，我但求 secure到個 loan就得喇。」
重中之重係，返到香港要出席一個勁唔想去因為有好多老餅嘅飯局，而竟然喺一個咁嘅飯局俾我識咗一位年輕貌美嘅大狀秘書。 But truth be told，年輕貌美的她也有缺點，就是， my goodness，上圍跟纖腰過分地不合比例，咁當然，呢啲缺點，作為一個注重內涵嘅 gentleman， I am more than happy to overlook。
未夠一個禮拜，應該係話，未夠三十個短訊，秘書已經約我食 lunch。
秘書話佢嘅 lunch time只有一個鐘，地點任我揀，但最好近佢 chambers多啲，即係都爹利街。講得係都爹利街，又想有少少 date嘅感覺，選擇不外乎兩個： Beefbar同 Wolfgang。兩者擇其一，正常人都會揀 Beefbar，所以我揀咗 Beefbar。
奇怪嘅事，就喺食 lunch當日嘅朝早發生。住喺 D.C.嘅一位 cousin無端端 WhatsApp咗一幅 crab cake嘅相俾我，我即刻流晒口水，好想食 crab cake。於是喺中午嗰陣，我打去 Beefbar問有冇 crab cake，佢哋話冇，再打去問 Wolfgang，竟然有。就係咁，最後我轉訂 Wolfgang。
「緣」這個字，說得感性一點，其實就是上天為你寫好的小說。個天要你做一，就算你明明想做二，最後唔知點解，都會揀番一。
約定一時十五分，但我早到半小時。目光向四處一撒，遠遠看見恒隆地產的太子爺，跟幾位太傅坐在一起。強調，是太傅，不是老臣子。太傅是輔助太子的，老臣子是 old schmucks，養多一個都嫌多，只懂擦鞋的。
繼續向餐廳的周圍掃視，看見一個好像在哪裡見過但一時三刻又說不出是誰的男人；這個男人對面是一位穿着深藍色 wrap dress的女士，雖然看不見女士的樣子，但她的背影有一種很暖、很冷、又很熟悉的感覺。正當我想得出神之際，侍應拿來餐牌，我的注意力便轉移到 set lunch去。
看過 set lunch，發覺當中沒有 crab cake，決定之後散叫。準備繼續埋首研究餐牌的時候，突然有把清朗而溫婉的聲音問：「 Do you mind？」
抬頭一望，呆住了，時間停止，空氣也跟着凝固。我眼也不眨地瞧着一身深藍色 wrap dress的她，看了不知多久才有氣力站起來，右手微微伸出，手心向上，乾涸的喉嚨吐出一句：「 Please，坐幾耐都得。」
當兩位朋友在街上偶遇，而雙方的開場白都沒有說出對方的名字，不是因為無禮，而是因為彼此也是對方的一位舊人。什麼是舊人？認識了很久，經歷了很多，一個眼神已經是千言萬語。
耳環好襯你、條裙好靚、唔鍾意食牛扒都嚟 steakhouse？通通的開場白只是空想，真正說出口的第一句，說了出來便後悔：「 Long time，有冇三年？」三年前發生過什麼事，不可能忘記。「三年」兩個字勾起了不想回憶的回憶，「有冇三年」是糊塗得不能再糊塗的開場白。
「冇計過。」她說，帶着微笑， a smile that did not touch her eyes，即是皮笑肉不笑。凝目看了她半晌，又半晌，再半晌，她的眉宇間彷彿有個漩渦吸了我進去。「你好靚。」我說。
我知， so you can stop looking，她說，然後我們都笑了。她沒有拿着手機，沒有拿着杯子，雙手微微疊在一起，安靜的放在餐枱上，淡定，大方，自然。面對着如此自信的人，感覺像是被吃掉一樣。
我繼續看着她，沉澱了良久，說：「幾好嗎？」她的眉毛輕揚，卻依然神色安寧，說：「轉咗工冇幾耐， getting used to it。」
我感覺到那個很熟口面的男人望了過來，於是問：「你朋友？」其實我係想問佢係唔係男朋友，如果係，我即刻搵兩個黑鬼招呼佢。她的唇邊浮起一個沒有溫度的笑容，好像在說「關你差事」。
「舊老細。」她答道。下屬蟬過別枝，還要相約午飯，非奸即盜。正當我要問她轉了什麼工的時候，秘書來到了， worst timing。可恨的是，她看到年輕貌美的秘書，連丁點兒葡萄的表情也沒有；更可恨的是，當她回到自己那張餐枱的時候，她與舊老細便細聲講大聲笑；最最最可恨的是，舊老細笑起來有九成似王敏德。
半小時後，那個 crab cake我也沒吃多少，秘書突然問：「佢係邊個？」吓？「頭先個女人。」「 Danielle。」我說。「我唔係問個名。」佢係邊個同你有咩關係？「本來同我冇關係，但呢餐飯我食得好唔舒服，你全程除咗『係咩』、『係呀』、『啊』之外，乜都冇講過。」 Sorry，我食飯唔鍾意講嘢，你唔喜歡可以走先。
她難以置信的瞪大眼睛，一瞬間便拿着手袋跑了，我幾乎想叫杯紅酒慶祝。「埋單唔該，幫我同嗰張枱一齊埋。」我對侍應說。
「張單幫你埋咗。」我走過去跟 Danielle說，而她的表情沒有半分意外，反而是對面那個中坑好像很驚訝似的。「多謝晒， I am Arthur by the way。」他伸出手說。「 Marcus。」我說，緊緊握着他的手。「你係 Danielle舊同事？」我係佢以前 SP。「 SP？ Senior Partner？」 No， sex partner，我正經地說。「葉朗程，夠喇。」 Danielle緊皺眉頭。對唔住， that joke was out of line，你呢 Arthur，聽 Danielle講你係佢以前老闆。
「 Yes I was。」他笑着說，「我而家係佢未婚夫。」
|
鍾意就快D Share啦！
|
|
|
