發嫂，全名陳薈蓮。維基沒有關於她的條目。「內容農場」（Content Farm）倒是有很多，但內容好多都係錯。
例如，考考你，True OR False：
1.發嫂做過女警，True OR False？
2.發哥發嫂1987年註冊，True OR False？
3.發哥只花了唔使100蚊就娶到發嫂，True OR False？
4.發嫂賭錢叻過發哥，True OR False？
5.發嫂第一次穿裙，係18歲，True OR False？
除了第二題，其餘全部都係True。
仍是少女時代的發嫂，是新加坡人，讀書嗰陣，因為貪得意，當過駐校警察，還入過學堂正式受訓。「識揸槍？」「識！幾好哦呵？」
由今日開始，一連三周，周一至周五，十五集「我老公係發哥」——發嫂獨家訪，《蘋果》娛樂即時 X「娛果——蘋果娛樂」Facebook同步發放。今次是發嫂繼06年後，再次接受傳媒專訪。
第一集，由女兒說起。
1991年，懷孕九個多月的發嫂，臨盆前一星期，女兒因臍帶纏頸，胎死腹中。最後發嫂選擇了自然分娩，產後護士迅速抱走孩子，因為發哥不想妻子見到而再受打擊，但發嫂最後自己都看了。
26年後，發嫂說起往事，仍然忍不住落淚。
91年，發哥發嫂婚後五年，發嫂向傳媒承認懷孕。翻看當年的報道，還寫道：「發嫂發覺個多月沒有來經期，所以獨自看醫生，醫生為她檢查之後，立即恭喜她，當時發嫂在醫務所知道自己有喜的消息，內心的喜悅難禁，她感動得幾乎落淚。回到家裡將此事告知丈夫，發仔聽後的第一反應很平靜，但發嫂看得出她的丈夫很開心，立刻吩咐她不可以操勞，暫時不可以回公司上班，發仔買了大批酸蘿蔔給太太吃，怕太太會作嘔、作悶。」報道還寫道，發哥（當時還是稱「發仔」）已在家煮了一個月飯，待工人來港「接更」。
結果命運大神為周氏夫婦安排了另一條路。
「應該講，到今時今日，我有諗個女㗎。」發嫂深深吸了一口氣，續說：「因為嗰個經歷係實在係……冇想像。」
「因為嗰日……嗰晚前一晚我未睇醫生，個BB就……突然間我問我老公，『做咩個女今日唔踢我肚呢咁乖？』」當時距預產期只有一星期。
發嫂覺得不對勁，翌日起來就去睇醫生，情景歷歷在目：「第二日落好大雨，我間住水，喺旺角，嚟到膝頭哥，去睇醫生。」發嫂用手比劃水深及膝高度。那彷彿是一場誓不言休的暴雨。
入到診所，做了初步檢查，醫生沒跟發嫂說甚麼，只是說：要入院。
發嫂憶述：「我就……我睇下佢個樣，好似有少少唔妥，但我唔知乜嘢事。我覺得有少少問題，但我冇諗到咁壞。於是我老公就帶我去醫院。」
如墮五里霧中的發嫂，由發哥陪同下入院。「去到法國醫院，scan晒所有嘢。嗰啲姑娘同埋醫生，直情個表情俾我知道，有一啲嘢唔係幾好，係好大件事㗎喇。」發嫂抹了抹鼻、望了望天，續說：「佢（指醫生）就叫我老公入嚟：『不如你自己同你老婆講。』」
發嫂頓了頓，「咁好，講咗。講咗呢，醫生話，你不如叫周太開刀啦。」意思是剖腹取出死胎。發嫂拒絕。「我講，我唔要（開刀）。」
「當時你已經知道咗個結果？」發嫂就謂：「因為我老公講囉。醫生姑娘全部好sad，唔講俾我聽。醫生講要開刀，因為唔想我經歷呢個，因為BB死咗入面。我講無論如何，點我都要經過呢個過程，我都陀咗咁耐啦。」然後頓了頓，沉默良久。
發嫂難過，發哥更是。
發嫂用力地透大氣，望向另一邊，避開鏡頭。「佢就……（發哥）晚晚陪住我囉……但係我好……嗰刻呢我唔知做乜嘢，我冇喊，我冇喊。」聲線微顫：「我唯一係喺腦中一句嘢啫，『做咩係我？』嗰刻就諗緊，做咩呢單嘢要發生喺我身上？」
「我要等到七年，甚至乎等到七年之後，我至明白個道理。」
採訪：陳月媚、倩宜
攝錄：卓振輝、廖達燊、吉吉
攝影：郭賢興、陳順禎
協力：林德雄
髮型：Byron Ho、Louis
化妝：Fiona To
場地提供：香港嘉里酒店
更多娛聞，喺晒《娛果》
http://fb.com/appledailyent
|
鍾意就快D Share啦！
|
|
|