30歲失婚裕美裙下之臣停不了，繼8月被發現同台灣男撐枱腳（新聞連結： http://bit.ly/2hjFoCb ），前晚裕美再出擊轉嗒鬼佬，孖米九型爆老外行超市又拖又攬，被讀者關先生透過「爆相爆片」分享甜蜜蜜。裕美接受《蘋果》訪問大方認拍拖：「佢好錫我！」
關先生喺電話表示，前晚11點幾喺銅鑼灣惠康，見到裕美拖住鬼佬好風騷咁買嘢。期間，佢哋去到比較少人嘅位置玩抱抱，鬼佬好主動從後攬裕美，旁若無人，表現相當親密。佢哋選購咗蒸餾水、乳酪等就去埋單，最後由裕美負責俾錢，心情大靚拖住男友離開，關先生仲讚鬼佬好靚仔：「大約30歲，好高大似model。」
《蘋果》致電恭喜裕美拍拖，佢笑得好開心：「哈哈！多謝，我哋唔係好耐咋，我諗……真係好短。」有冇一個月呢？裕美話：「我諗差唔多，真係冇計住。」佢話係閨蜜介紹，男友係意大利mix英國，問到男友做甚麼工作？裕美表示：「生意，關於學校嘅嘢，喺網上學第二個國家語言，佢可以介紹啲好嘅學校，因為我本身都想進修英文，所以佢介紹咗英國某啲學校，網上視像學習方便啲。」
裕美好保護男友，唔肯透露對方名字，對於讀者讚男友靚仔，裕美甜笑：「哈哈！佢OK啦，但樣唔係重要，最緊要人品好好，吸引我係好錫我，對我好好，好紳士。其實自己英文唔係好叻，佢好有耐性解釋，大家傾多咗偈，好有共鳴。佢好鼓勵我，佢見到我開心，佢就會開心，佢為人比較實際，好慢熱，唔係好花言巧語，亦冇送花，我唔舒服就買橙畀我食。」
情路坎坷嘅裕美坦言：「講真我都拍唔少拖，以前好多人都有好浪漫嘢，好似拍戲咁，但人生唔係戲劇性，一個人錫你，對你好，你開心佢就開心，我覺得咁就足夠，互相欣賞好重要。」裕美指初時男友唔知佢係藝人，知道後亦冇乜特別反應。問到有冇同男友交代離過婚？裕美表示：「都有講吓以前感情狀況，但我哋唔多講以前，覺得過咗去嘅嘢就算。」男友係咪Mr. Right？裕美坦言：「呢啲好難講，今日唔知明日事，最緊要o依家好。」
至於喺超市裕美負責埋單，佢解釋：「因為我係買自己好多嘢，唔方便叫人畀錢，食飯都係今次我畀，下次佢畀，其實佢好好，乜都想佢自己畀，但我唔想好似老馮咁，我又唔係冇能力搵錢。」問到男友做生意係咪有錢人？裕美話：「我唔知有錢乜定義，唔想畀人覺得我係因人哋啲環境，我從來都唔係，唔會因為人哋條件鍾意人，係睇人品。」發展到乜階段？佢話：「嘩，冇咁快同居啦，唔會啦，畀啲空間我哋。」
|
鍾意就快D Share啦！
|
|
|