熱爆娛樂: 【爆相爆片】怕醜老公做跟得人夫鍾嘉欣一家秘密返港過中秋節 _

2017年10月4日星期三

【爆相爆片】怕醜老公做跟得人夫鍾嘉欣一家秘密返港過中秋節 __,嘉欣,鍾嘉欣,

「婦女黨」要員鍾嘉欣（Linda），舊年同脊醫老公Jeremy結婚後生咗囡囡Kelly，自此Linda全職做家庭主婦，長居加拿大湊女，只係間中返港出席公開活動賺吓奶粉錢。

睇番Linda每次返港，唔係一個人就只係帶埋囡囡，IG亦只貼兩母女嘅相，怕醜老公除咗結婚正日有露過吓面，之後都冇乜一家三口合體出現過，就算上個月，嘉欣同老公孖住去渡假，兩公婆亦只係得「背多fun」開心share，嘉欣另一半，真係好低調吓。(新聞連結：http://bit.ly/2fI5OQy)

以為嘉欣老公深閏唔出門？錯啦，有讀者陳小姐就透過《蘋果》「爆相爆片」，話喺周日(1日)下晝2點半，見到嘉欣推住載有囡囡Kelly嘅BB車，喺機場嘅入境大堂出現，同行嘅，仲有佢老公Jeremy。陳小姐表示：「嘉欣戴住黑超出嚟，佢老公都有戴黑超，喺後面負責推行李。見佢哋一出大堂就行得好急好快，又耷低頭，所以都冇乜人見到佢哋，之後佢哋就沿住大堂直行去停車場。」

據知，嘉欣今次同埋老公囡囡返香港，除咗噚日上好友馬浚偉嘅商台節目做嘉賓外，佢仲打算喺香港逗留兩個禮拜，主要係趁住中秋節，探親兼同朋友聚舊，之後嘉欣就會飛去馬來西亞出席活動，今次老公有長假期空檔，馬國之行，一樣會陪埋老婆飛過去。

而下年同大台約滿嘅嘉欣，已經兩年冇拍過戲，有消息指嚟緊佢會為大台拍新劇《再創世紀》，而大台為咗遷就佢，劇組仲會去溫哥華拍外景一個月，方便佢湊女同照顧老公咁話，日前有報道仲話嘉欣打算等Kelly兩歲時，就為老公追多個(新聞連結：http://bit.ly/2exrxdF )，若然係真嘅話，真係有排都唔使再睇嘉欣BB做戲囉。

(圖片由讀者提供)	鍾嘉欣國慶當日同老公、囡囡喺機場現身，怕醜老公Jeremy負責推行李，嘉欣BB負責推囡囡Kelly。(圖片由讀者提供)	兩公婆都戴黑超。(圖片由讀者提供)
一出機場大堂即急步行去停車場。有指佢哋會喺香港逼留幾日探朋友。(圖片由讀者提供)	嘉欣BB位脊醫老公，只係喺結婚嗰陣露過面。	有指兩公婆想追多個。(資料圖片)
嘉欣BB婚後做全職媽媽湊囡囡Kelly，若然生多個，睇怕都好難抽到身拍劇。 (資料圖片)	嘉欣BB噚日上好友馬浚偉商台節目做嘉賓。