(新增回應)
個個都拍拖，唔通阿嬌(鍾欣潼)唔想拍拖咩！
就係咁，今年36歲，以往好少講感情事嘅阿嬌，日前甜蜜承認同台灣婦科醫生賴弘國拍拖，仲話想呢段感情可以開花結果o忝！(新聞連結：http://bit.ly/2kPXkJ7 )
阿嬌同賴弘國撻着，有傳係因為女方早排過台灣拍新戲《動物系戀人啊》，經朋友介紹認識嘅。不過，蜜運緊嘅阿嬌，今日就俾台灣《蘋果日報》爆出，指佢喺拍《動》片時，試過有一場戲狂NG，搞到拍檔賀軍翔(小美)好鬼嬲，仲忍唔住即場爆粗，搞到阿嬌爆喊。
報道指有劇組人員爆料，話套戲其實要拍3個月，但臨煞科前，阿嬌中途要請假，飛大陸參加商演活動，之後再趕返台灣拍戲，唔知係咪舟車勞頓太過頻撲，劇本冇背好頻頻NG，因此激嬲同佢有大量對手戲嘅賀軍翔，結果遭賀爆粗問候，自責加上當眾受辱，所以咪喊起上嚟囉。
日前喺煞科宴上，劇組人員仲講緊呢件「花生」事件。記者就此事問導演瞿友寧，佢話：「那天我沒有聽到也沒看到賀軍翔有罵髒話，但阿嬌有哭，她事後有傳簡訊給我道歉，說真的是太累所以詞沒有背好。我說沒關係，休息就好了，之後都拍得很順利。」
問導演會唔會因為賀軍翔對戲有人心不在焉，先會忍唔住爆粗？瞿友寧話：「這我就不知道了，至少最後殺青時他們還是好好的，還互相擁抱。」 針對此事，賀軍翔透過發言人否認話：「合作得非常愉快，不需要渲染不實的傳言。」
對於阿嬌被指遭賀軍翔鬧爆而喊爆，阿嬌經理人霍汶希Mani今日回應話：「個巡迴演唱會一早喺個劇之前接咗，佢做演唱會之後返番去劇組，20幾個鐘頭冇瞓好攰，嗰場戲其實冇對白嘅，唔係傳聞咁樣話佢甩劇本，只不過有個動作係導演叫佢擺啲cream落小美(賀軍翔)個口，佢聽唔到擺咗落塊面，所以佢好自責，唔夠精神聽唔到導演講嘅嘢，所以佢好自責咁喊囉，停唔到咁喊，但小美絕對冇鬧佢，同埋嗰日佢係拍唔到，所以佢想喺度同各位影響到嘅人仕包括小美同導演講聲對唔住。」
|
鍾意就快D Share啦！
|
|
|