7年前，廉署嘅「威遠」行動，令當時喺無綫身居要職、叱咤一時嘅陳志雲，涉貪惹上官非。案件糾纏多年，到今年3月，法院終頒下判詞，裁定陳志雲同密友叢培崑上訴得直。
免卻身陷囹圄之險，撥開雲霧見青天，的確令人鼓舞，不過喺「威遠」行動中，衍生嘅勵志故事，又點止志雲大師一個，曾經喺《志雲飯局》負責捧餐嘅寧進，當年亦有被廉署調查，猶幸係個幾月後，獲廉署撤銷擔保，全身而退。
不過亦因為呢件事，寧進決定離開做咗近10年嘅無綫，往外闖嘅佢，未有如其他藝員咁，北上或過檔發展，反而轉行做經紀，做咗7年經紀嘅佢，由屋村地產舖做到中環半山，由住屯門公屋做到高峰期有6、7層自置物業，年初更以1,100萬購入堅道1個700呎實用單位，正式由屋邨仔升呢上半山。
由無綫放棄到自己有一條team，現時連手下每月都搵到6位數，不過寧進未有意氣風發，坐喺地產公司經理房嘅佢反而話：「其實無綫嗰時唔要我，我好唔開心，不過諗深一層，自己嗰時都30歲，仲喺電視台行行企企都唔係辦法，啱啱有朋友喺紅磡做地產，記得細個阿媽教落做人一定要有瓦遮頭，但嗰時自己都冇牌，朋友就話可以邊做邊考牌，跟住就開始做咗地產經紀。」
由住公屋到住中環半山，寧進坦言自己學歷唔高，勝在把口吹得，而且由細到大，人際關係都係自己嘅強項，所以逐漸開始摸到門路，繼而得心應手。「我成日同人講，碩士、博士，都不及人事，我天生鍾意講嘢，鍾意識朋友，變相我原先已有一大班朋友網絡，再加上見客、call新客，企街做open day，咁啲客買完樓，你問吓佢哋做唔做到按揭，多啲關心吓佢哋，只要同佢哋做咗朋友，佢嘅朋友就自然成為你嘅朋友，買樓又會搵番你，咁就會有好多翻頭客。」
寧進話做地產有另一個好處，就係分comission時。「通常會有一大嚿錢，你只需用呢嚿錢去做首期，之後租俾人等人幫你供樓，供樓壓力就會減輕好多。如果係打工仔，想儲首期真係儲到天光都未必儲到。」
更多娛聞，喺晒《娛果》
http://fb.com/appledailyent
| (攝影：陳慧安) | | |
| | | |
| | | |
|
鍾意就快D Share啦！
|
|
|
