35歲賈曉晨（JJ）大前日榮升做媽咪，囡囡「飯兜」早產個多星期，重6.4磅，由剖腹變順產，慳番開刀錢，JJ於產前兩日曾發燒，幸母女平安。44歲的老公樊少皇由內地趕返港陪入產房，昨在微博晒JJ抱女相公告喜訊，新手媽咪努力嘗試餵人奶，囡囡似足父母混合體，JJ開心說：「嘴同下巴似我，鼻就似少皇。」
力王樊少皇和宅男女神賈曉晨拍拖三年，兩人經歷幾許風雨終於修成正果，前年元旦日低調行禮，人妻JJ跟老公返內地生活，去年6月宣告造人成功，月前才返港待產，樊少皇昨在微博晒JJ抱女相並留言：「小飯兜歡迎你的到來，要疼媽咪哦，我愛你們！」JJ亦轉發帖文讚囡囡：「大飯兜，女漢子，終於見到你了。」相中的JJ望着懷中女兒微笑，兩夫婦分別暱稱女兒做「大飯兜」及「小飯兜」，溫馨滿瀉。
產前發燒
JJ昨日已出院返家休息，她以短訊回覆本報，透露女兒於大前日出世，體重6.4磅，比預產期12月初早了出世：「成件事幾急，自己都未ready好，係早咗個幾星期出世。原本諗住開刀生，𠵱家變咗順產，好彩少皇都趕得切喺內地飛返嚟，有陪我入產房。」她表示正努力嘗試餵人奶，問到BB似爸爸或媽媽？她笑說：「嘴同下巴似我，鼻就似少皇，見到少少雙眼皮，但BB要瞓覺，未開眼都唔知似邊個。」
原來臨盆前兩日，JJ身體不適曾在社交網留言：「完蛋了，有點發燒。」當時不知是否因為B女即將出世，緊張到發燒呢？前日JJ貼上跟陳宛蔚和味之天使「士多啤梨」周麗欣去high tea相，肚大如籮的JJ和懷胎7個多月的陳宛蔚一臉幸福，JJ留言：「同好友飲茶，別看我故作輕鬆，其實要扶牆走路了。」
狂踢媽咪
明年初生得的陳宛蔚昨在電話恭喜JJ：「咁快生咗？佢嘅預產期應該未到，生咗好戥佢好開心呀。」問JJ是否陀得好辛苦？感同身受的陳宛蔚說：「唉！邊個媽媽唔辛苦吖，始終第一次經歷，好多擔心同唔習慣，我就陀得都OK嘅，可能之前睇中醫調理，希望BB女出世後，可以同JJ嘅囡囡做好朋友，有朋友一齊成長係好事。」
此外，初為人母的JJ在微博記錄懷孕過程，她上周留言：「飯兜，你連續一星期每天都是狂踢我一整夜呀，每晚我都忍不住眼角流淚，頭頂冒汗！我決定不再叫你小飯兜，我要叫你大飯兜！而且你是打功夫的好材料」、「變着花樣踢、不停的踢，並且踢到我肋骨響」，她又感謝老公：「謝謝你對我最最最大限度的包容！現在我的情緒就像心電圖一樣波動，像過山車一樣危險，連我自己都覺得自己瘋了，只有你能忍！」上月，有網友在醫院偶遇樊少皇陪JJ做產檢，兩人戴黑色口罩遮樣，網友留言：「好恩愛啊，全程手牽手。」
採訪：嵐山
|
鍾意就快D Share啦！
|
|
|
