產後復出的歌手吳若希（Jinny）相隔一年多現身電台，宣傳劇集《那年花開月正圓》的主題曲《你在我心間》，表示新歌是生完BB後第一首錄的歌，問到可是全面復出？她表示：「係呀，開始做嘢，尋日又出咗首新歌，係《降魔的》插曲，之後又會有首歌係《誇世代》嘅插曲，所以一係唔嚟，一係就三隻一齊嚟。」
要收復定中失地
問到可是要重拾一姐地位？她笑言要收復失地：「因為我每次返到屋企，個囡都係黐爸爸或者工人多啲。」她亦謂7個月大的囡囡現時識做抱抱手勢叫她抱，笑言好冧，自己在撒嬌方面完全輸畀個囡：「你問我對住我老公撒嬌呢樣嘢，我真係輸100分畀個囡，我個囡真係滿分。（呷個囡醋？）冇，見到好sweet。」
新歌唔見得光同許廷鏗有關
講到師妹菊梓喬（Hana）是星夢第一個衝出香港拍MV的人，Jinny即扮嬲笑言：「係囉，條橋我提議㗎，我嬲呀！我係第一個向老闆（何哲圖）提議去台灣拍MV，因為台灣嘅製作成本同香港差唔多，老闆話好呀，但結果畀咗第二個人去拍，其實咁啱我啲歌又未錄起，所以就冇啦，而胡鴻鈞就係第二個去台灣拍MV。（你向老闆提議做第三個？ ）唔使啦，因為其實我都去過台灣拍MV，未生BB前同許廷鏗去咗，不過因為首歌未plug，所以就冇啦。（會唔會plug番？）到時先。」據知該曲未見街因與許廷鏗跳槽華納有關。但Jinny亦謂其實公司很錫她，十月時整隊香港crew到澳門為她拍新歌MV，講到Hana威脅其一姐地位，她笑言：「我依家威脅佢，我係人妻，又係人母，多幾個title。」
老公都係冇求婚
而講到之前與老公到歐洲影婚紗相，Jinny笑言：「冇難忘。（你Instagram啲相好sweet？）嗰啲唔sweet。（即係有啲更sweet？）係呀，嗰啲好假，有好sweet嘅pose，但成件事唔sweet。（佢有冇順便求婚？）冇喎，嬲！」她亦謂老公一月會與她去日本滑雪，問到可會期待老公求婚？她亦謂：「冇喎，已經結咗婚。」至於講到無綫「限奶令」，她即大笑：「對我冇影響。（覺得指引好定壞？）好嘅，自從我做咗媽咪之後，發現接觸電視嘅機會係好高，如果小朋友接觸到太多呢啲需要家長指引嘅畫面都唔係幾好，可以意會表達一件事都得，但覺得旅遊節目就唔需要太大限制。（但你哋有時出隆重場合如台慶都可能需要性感打扮？）我又覺得冇嘢，佢個限制又冇話好死。」
何哲圖指兩女關係ok
至於「搶」Jinny去台灣拍MV建議的Hana則透過電話回覆，笑言：「有啲咁嘅事？佢（Jinny）成日都講笑，我知佢唔會嬲，因為我哋平時都食飯傾偈，佢都話鍾意我啲歌。」何哲圖亦透過電話回應，坦承Jinny有向他提及到台灣拍MV一事：「但因為佢之前要結婚，其實我哋會分批去外地拍，佢依家呢首新歌都喺澳門拍，我哋都計劃遲啲安排佢去台灣拍兩首新歌MV，因為TVB喺台灣有製作中心。（幾時會去拍？）未知，搵到兩首好啲嘅歌就去。（會唔會畀Jinny去日本等貴啲嘅地方拍MV？）因為台灣同香港嘅拍攝手法唔同，所以想學吓，等大家有耳目一新嘅感覺。」講到Jinny話自己嬲，他表示：「誤會。（Jinny提出條橋，但你畀咗Hana拍，事前有冇話畀Jinny聽？）冇。（唔係幾好？）唔會，我同阿妹（Jinny）好熟，佢唔會嬲。（擔心兩女不和？）唔會，佢哋關係OK。」
|
鍾意就快D Share啦！
|
|
|