【我老公係發哥連載系列14之掃街王后】
周潤發與太太陳薈蓮愛平民港式生活，除因拍戲工作出埠外，兩公婆最愛流連九龍城，發嫂更笑言九龍城是她半個鄉下，日前她帶本報記者在九龍城拍攝她的起居生活，不少街坊都搵她「集郵」。
發嫂當日就介紹她平時最愛在九龍城的掃街小店，嬌滴滴的她原來是「吃貨」，短短一條侯王道，一個小時多已食足7餐，當中有去食串燒，大叫沙嗲燒賣、燒雞、雞翼等，落了柯打就走入茶記點叉燒蛋飯，要走到「坤記牛腩」食撈河、淨魚蛋等，發嫂更爆發哥最愛食牛肉麵。
攬契仔傾密偈
食完鹹點，發嫂再動身去買蛋撻，與店舖員工熟絡的她更幫手賣貨，推銷榴槤月餅。最後一站就去篤魚蛋，原來店中小朋友是她契仔，她一見契仔即抱入懷傾密偈。
問到發嫂是否愛掃平民美食，她笑言：「好鍾意，成日周街掃，乜都食冇節制，食多啲burn多啲，平時自己肚餓落嚟，一係就同發哥嚟，最鍾意食魚蛋、蛋撻，發哥最鍾意叫隔籬舖嘅叉燒蛋飯，加洋葱、加個汁先好食，做運動都要補充。」
新年前必找數
發嫂一路食，一路笑：「死啦，真係死好多。」記者問到與發哥撐枱腳邊個找數，她就笑言成日賒數，欠下一身街數：「叫老闆欠住錢先，我成日周街欠人錢，有一次周潤發同我講，新年喇，新年唔好爭人數，所以我叫佢即刻載我落嚟，走幾個單位去找數。」
記者：陳月媚、倩宜
攝影：郭賢興、陳順禎
協力：林德雄
髮型：Byron Ho、Louis＠ Hair Culture
化妝：Fiona To
|
鍾意就快D Share啦！
|
|
|