女星周麗淇（Niki）、孫儷及陳曉等演出的內地劇集《那年花開月正圓》，播出以來收視及口碑同樣報捷，網上更錄得逾一百億點擊，促使一眾主角人氣急升，風頭一時無兩，該劇近日還安排於無綫播放。而劇中飾演「千紅」的Niki，更剛於「第四屆橫店影視節」獲得「最佳女配角」。
對於該劇如此受歡迎，Niki坦言意料不及:「當初知道點擊去到咁多時，心諗個數據係點計？即係幾多人睇？好多疑問，不過有幸參與呢套劇，冇諗過香港都咁多人睇，而家播緊配音版，孫儷、陳曉佢哋都想知廣東話版係配成點，我都好期待。」
談到與戲中演員均是首次合作，與孫儷更是演好姊妹，Niki大讚對方是一位很好的對手，奈何時間有限，開工時大家各自專注角色當中，未有太多演技上交流，相反戲外分享較多，她謂:「大家生活上有共同話題，好似養生同運動（邊幕最深刻？）有一場打陳曉嘅戲，第一日開工就拍，打到我手腫又瘀又痛，佢都冇反應，可能太瘦，我只係打到佢啲骨啦!」
談到劇中為愛情不惜一切，現實生活中的Niki笑指亦曾為愛情付出，她謂:「每個人都肯為愛付出，好似犧牲時間、工作，冇就唔叫愛情，愛情來嘅時候可能會懶啲，依家未有咪邊做邊等，有嘅時候咪可能減少啲工作，可能一年一套咁，其實呢幾年喺內地發展，我享受呢個時刻，不過都有同經理人傾，拍完無綫劇集《再創世紀》會休息充電。」
對於《那》劇後吸引不少商演及廣告送上門，惟因檔期未能配合而推掉，損失難以想像，Niki無奈謂：「有同《再》劇監製講為咗佢唔賺錢，再加上我係要集中精神嘅演員，要長時間代入角色，同一時間只能做一樣嘢，的確《那》劇後係有好好質素嘅劇搵我，好多廣告同商演都接唔到（損失數字可以買樓？）哈哈！叫監製賠番畀我。」
化妝：Navi Lam
髮型：Deddy Kwan＠HAiR Salon
服裝：Burberry
場地：HAiR Salon
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|