親情何價？人人把尺都唔同，2千蚊定800萬？
娛圈「金牌媒人」顧紹芬（Boe媽），八九十後應該唔識，但去年一則新聞，令Boe媽成為風頭躉。
去年9月，新世界發展名譽主席鄭裕彤病逝，Boe媽隨即現身，指摘於彤叔身邊待足8年的紅顏知己顧美蓮（Cindy），原來Cindy係Boe媽姪女，即大哥女兒，自幼叫Boe媽做「姑媽」（廣東話應為：姑姐）。兩姑姪近年因財失義，據知Boe媽上周更向Cindy發律師信，追討傲雲峰單位及生活津貼。
姑姪因財失義風波暫緩一年，近日再起漣漪，Boe媽上周花約二千蚊聘律師向Cindy出信，內容中提到Boe媽指彤叔喺2010年答應將傲雲峰第三座一個高層單位送俾佢，但又擔心Boe媽賭輸錢，所以單位暫時委交畀Cindy。
Boe媽於2011年到2015年期間於居於上址；2015年，Cindy以裝修為理由，要求Boe媽遷出，並指裝修後可搬返去，但此承諾一直未有兌現，故Boe媽要求Cindy於發於律師信後兩周內回覆，稱提供兩個選擇：1.將物業歸還；2.給予800萬代替，Boe媽更要求Cindy一向賠償搬走後支付租金損失。
Boe媽特地選在傲雲峰門前，接受《蘋果》爆料，再無限loop與Cindy恩怨，又斥Cindy不感恩：「我同彤叔好好朋友，十幾年，佢（Cindy）話想搵份工做，佢要嚟香港攞商務簽證搵份工，。佢18歲，我申請佢嚟香港三個月探親，住我屋企，食我嘅、住我嘅、穿我嘅，買衫買鞋都係我，自己姪女冇計較。」Boe媽繼續話：「佢話將來將層樓轉畀我，依家冇轉到，呃我出嚟，又唔幫我返去。佢連我大哥電話都換咗，為咗呢層樓斷絕埋親戚關係。」
Boe媽話同老公同兩名兒子租住同屋苑另一個單位，「佢（Cindy）同我交咗一年租，月租17,000幾，我壓力好大，好重皮。」既然負擔唔嚟，何不另覓新居？她稱：「因為佢簽咗一年生約，一年死約，我要討個公道畀我啲仔，租約將到期，我睇吓佢想點，我依家搵律師講佢聽，如佢唔回覆，我諗住去法院告佢。」
以Boe媽情況，手頭冇實質屋契或文件做證據，勝算成疑。問到當年點解屋契冇加佢個名？Boe媽解釋：「佢哋話驚我日日去澳門玩，賭輸晒。佢（Cindy）話層樓寫佢名，我就唔同佢計較，大家親戚會相信。」Boe媽每次去澳門賭博會下注幾大？她稱：「幾百蚊，同個女朋友玩吓，我買好少，500蚊。」
Boe稱知道Cindy如今身在美國，又揚言要告到底：「我賠晒律師費都願，破產我都要告佢，因為我要出呢度氣！」
| （攝影：陳俊強） | | |
| |
|
鍾意就快D Share啦！
|
|
|
