花弗陳欣健：只求佢有5秒清醒
年過七旬依然風流瀟灑的陳欣健，雖然家有結婚40載的明星髮妻尤情，但多年來身邊的女伴氹氹轉多達27位，左擁右抱平常不過，近年修心養性的他承認對太太唔住，對大女兒亦有愧疚，更自爆初戀女友因他而被迫墮胎，畢生欠下「女人債」！
「娛圈奇人」陳欣健（Philip）縱橫圈中40幾年，曾經當過主持、演員、導演、編劇、製片、電影策劃、娛樂公司管理層等等，他下月更會舉行「處男騷」。今年72歲的Philip，其太太尤情是60年代邵氏女星，曾演出過電影《三笑》、《相思河畔》等，夫婦育有兩個女兒，雖然結婚多年，但Philip老當益壯，人老心不老，身邊女伴氹氹轉，其好友甘國亮更爆他女友多達27位，而Philip亦直認多紅顏知己！兩年前深宵更被本報捕獲一拖二夜蒲，而他亦直認對不起太太！
謝太太包容 懂珍惜
近日憑網劇《反黑》熱爆互聯網的Philip，接受車淑梅主持的電台節目《舊日的足跡》訪問，他罕有地親揭與太太的關係，以及對女兒心存愧疚。在多姿多采的娛樂圈，Philip的緋聞從未間斷，被問到與太太的關係有否受影響？他說：「43年嘅婚姻，我成日唔喺屋企又好多緋聞，太太一定唔開心。我多謝佢嘅容忍，佢亦知道我珍惜屋企。」
Philip首次披露太太尤情近年有輕微腦退化症，猶如活在虛幻世界，他說︰「依家我會減少啲出街，陪佢睇卡通片，佢好似錄音機咁，同一個問題問上100次，但我都會笑住咁答佢，算係苦中作樂，但求佢有5秒嘅清醒微笑，我都會好開心！」他承認自己一輩子都對不起太太，自言：「雖然我唔係一個合格嘅丈夫，但確係一個盡責嘅丈夫。」
棒打鴛鴦成為烙印
除了愧對妻女，Philip也難忘初戀女友為他帶來的傷痛，未入娛樂圈前他當過差，當年任職警隊，並於短時間內晉升為最年輕的警司，惜戀情受阻，苦情得像當年粵語片的劇情，他自爆：「初戀情人當時懷有我嘅骨肉，但遭對方嘅母親反對，最後仲逼佢打掉孩子同我分手。」這段陳年往事，亦成為Philip一生烙印！
文：音樂組
|
鍾意就快D Share啦！
|
|
|
